Հայաստանի կառավարությունը որոշում է կայացրել Տավուշի մարզի Իջևան համայնքի Գետահովիտ բնակավայրում նախատեսվող ֆուտբոլային մարզադաշտի կառուցման նպատակով հատկացնել 57,75 մլն դրամ։ Գումարը նախատեսված է մարզադաշտի տարածքի ընդլայնման համար անհրաժեշտ երեք լրացուցիչ հողամասերի ձեռքբերմանը։
Ըստ որոշման՝ ֆինանսական միջոցները կփոխանցվեն Իջևանի համայնքապետարանին, որը կգնի մասնավոր սեփականատերերին պատկանող հողատարածքները, կփոխի դրանց նպատակային նշանակությունը և հետագայում դրանք կփոխանցի Հայաստանի Հանրապետությանը։
Նախագիծն իրականացվում է 2029 թվականին նախատեսված Ֆուտբոլի մինչև 20 տարեկանների աշխարհի առաջնության նախապատրաստական աշխատանքների շրջանակում։ Հայաստանը մրցաշարը կընդունի Վրաստանի հետ համատեղ, և դրա անցկացման համար անհրաժեշտ է ունենալ ՈւԵՖԱ-ի 4-րդ կատեգորիայի չափանիշներին համապատասխան մարզադաշտեր։
Գետահովիտում նախկինում արդեն ձեռք էր բերվել շուրջ 66 հազար քառակուսի մետր ընդհանուր մակերեսով հողատարածք, որը պատկանում էր 20 սեփականատերերի։ Այդ նպատակով կառավարությունն ավելի վաղ հատկացրել էր մոտ 329,9 մլն դրամ։ Սակայն լրացուցիչ ուսումնասիրությունները ցույց են տվել, որ մարզադաշտի ամբողջական կառուցման համար անհրաժեշտ է նաև ևս երեք հողամաս՝ ընդհանուր 11 550 քառակուսի մետր մակերեսով։
Ներկայացված հիմնավորման համաձայն՝ հողատարածքների սեփականատերերը համաձայնել են վաճառել դրանք մեկ քառակուսի մետրի դիմաց 5000 դրամ արժեքով, ինչի արդյունքում լրացուցիչ պահանջվող ֆինանսավորումը կազմել է 57,75 մլն դրամ։
Կառավարության գնահատմամբ՝ այս որոշումը կարևոր քայլ է Իջևանում ՈւԵՖԱ-ի 4-րդ կատեգորիայի պահանջներին համապատասխան մարզադաշտի կառուցման համար անհրաժեշտ պայմանների ապահովման ուղղությամբ՝ 2029 թվականի աշխարհի երիտասարդական առաջնությանը պատրաստվելու նպատակով։
Նախատեսվում է, որ մինչև առաջնության մեկնարկը նման չափանիշներին համապատասխան նոր մարզադաշտ կկառուցվի նաև Վանաձորում։ Միաժամանակ «Ակադեմիական քաղաք» ծրագրի շրջանակում նախատեսվում է կառուցել ազգային մարզադաշտ, որը կունենա շուրջ 35 հազար հանդիսականի համար նախատեսված նստատեղեր։
Հավելենք, որ հունիսի 25-ին կառավարությունն արդեն իսկ հաստատել էր 177 մլն 820 հազար դրամի հատկացումը Իջևանում նախատեսվող մարզադաշտի նախագծային աշխատանքների իրականացման համար։
