Չարենցավանը կամաց-կամաց դառնալու է եվրոպական փոքր քաղաքի տեսք ունեցող քաղաք․ Շահգալդյան

Մենք երեկ գրել էինք, որ Չարենցավան խոշորացված համայնքում սեպտեմբերի 25-ին կայացած ՏԻՄ ընտրություններում պարտվելուց հետո ՔՊ-ն հոժարակամ մասնակցում է ավագանու նիստերին։ Մինչդեռ որոշ համայնքներում, հիշեցնենք, որտեղ էլի պարտվել է ՔՊ-ն, հիմնականում բոյկոտում են նիստերը, որ տապալեն քաղաքային կառավարումը։ Չարենցավանի վերընտրված քաղաքապետ Հակոբ Շահգալդյանը Hraparak.am-ի հետ զրույցում ասաց, որ համայնքի 2023 թվականի բյուջեն դեռ չեն հաստատել՝ դեկտեմբերի 26-ին է նախատեսված բյուջեի քննարկումը։ Թե ինչ է նախատեսված եկող տարվա բյուջեով, Շահգալդյանն ասաց․ «Ինչ անցյալ տարի մենք կատարել ենք՝ բակային ասֆալտապատում, մոտ 15-20 հազար քառակուսի կմ նորից նախատեսելու ենք՝ դա ֆինանսական հոսքերից է կախված, կարող է մի քիչ ավել, մի քիչ պակաս լինել։ Խաղահրապարակների կառուցում ենք նախատեսում, գյուղերում նույնպես համատարած ասֆալտապատում ենք նախատեսում, մոտ 29 մլն դրամ հատկացվել է թիվ 1 մանկապարտեզի ամբողջական վերանորոգմանը՝ առաջին հարկն արդեն վերանորոգել ենք, և նաև կառավարության հետ սուբվենցիոն ծրագիր ենք նախապատրաստում թիվ 6 մանկապարտեզը վերանորոգելու, ինչպես նաև նոր աղբամաններ, նստարաններ ենք տեղադրելու»։ Հակոբ Շահգալդյանն ասաց նաև, որ կառավարության կողմցի բյուջեում ընդգրկված է նաև Չարենցավան-Կարենիս հանրապետական նշանակության ճանապարհի հիմնանորոգման հարցը, որի մեջ մտցվել է նաև քաղաքի կայարանամերձ հրապարակը։ Նախագիծ-նախահաշիվն արդեն պատրաստ է։ Իսկ ՄԱԿ-ի զարգացման հիմնադրամից էլ մոտ 70 հազար դոլարի աչփով դրամաշնորհ են ստանալու, որպեսզի վերանոգորեն Չարենցավան համայնքի խորհրդաիշը հանդիսացող Գանգրահեր տղայի հուշարձանը։ «Ասեմ, որ Չարենցավան մյուս տարի էս ժամանակ ունենալու է ավելի լավ տեսք, մեր մտածելակերպով՝ քաղաքը կամաց-կամաց դառնալու է եվրոպական փոքր քաղաքի տեսք ունեցող քաղաք»,-ասաց Հակոբ Շահգալդյանը։