«Եվրատեսիլում» Նիդերլանդները ներկայացնող երգիչ Յոսթ Քլայնը չի ներկայանա համաեվրոպական երգի մրցույթի ժյուրիի շոուում։
Այս մասին հայտնում են Եվրոպական հեռարձակողների միությունը (EBU) և Նիդերլանդների հեռարձակման կորպորացիան (NOS):
«Քննարկումներ են տեղի ունենում նաև EBU-ի և նախագծում ներգրավված հոլանդական հեռարձակողի՝ AVROTROS-ի միջև: Մինչ հետաքննությունը շարունակվում է, EBU-ն որոշել է, որ Յոսթ Քյալնը ելույթ չի ունենա մրցույթի երկրորդ գլխավոր փորձի ժամանակ, որի շրջանակում քվեարկում են 37 մասնակից երկրների ժյուրիները։ Փոխարենը կօգտագործվեն կիսաեզրափակիչում նրա ելույթի տեսագրությունը»,- հայտնել է EBU-ն։
Երկու կողմերն էլ նշել են, որ հոլանդացու ելույթի կասեցումը պայմանավորված է «վերջին միջադեպով», որին առնչվում է Քլայնը։ Միևնույն ժամանակ, ոչ EBU-ն, ոչ էլ NOS-ը չեն բացահայտել խորհրդավոր միջադեպի էությունը։
Լրագրողներն անմիջապես առաջ են քաշել կատարվածի երկու վարկած. առաջինի համաձայն՝ Europapa երգով ներկայացող 26-ամյա Քլայնի որակազրկումը կապված է լուսանկարչի հետ նրա ընդհարման հետ։ Երկրորդ վարկածի համաձայն՝ հետաքննությունը կապված է իսրայելցի մասնակից Էդեն Գոլանի հետ տեղի ունեցած միջադեպի հետ։ Կիսաեզրափակչից հետո կայացած մամուլի ասուլիսում լրագրողները երգչուհուն հարցրել են, թե արդյոք նա կարծում է, որ իր մասնակցությունը մրցույթին «ռիսկ ու վտանգ է ստեղծում այլ արտիստների համար»։ Մոդերատորը թույլ է տվել նրան չպատասխանել, ինչին ի պատասխան Քլայնը բարձրաձայն նշել է. «Ինչո՞ւ չպատասխանել»: Հետո նա ձեռքերը խաչել և փակ աչքերով լսել է Գոլանին։
Մրցույթի կազմակերպիչները հավաստիացրել են, որ այս տարի Նիդերլանդներին մասնակիցների ցուցակից ամբողջությամբ բացառելու ծրագրեր չկան։
