Հաշվի առնելով ԱԳ նախարարի պաշտոնը զբաղեցնող Միրզոյան Արարատի (կենցաղում՝ Արո) ակտիվությունը՝ որոշեցի հերթական անգամ անդրադառնալ այդ անձին:
Ակտիվության առաջին պահը նրա մասնակցությունն էր ԱԺ ընտրության կապակցությամբ հանրայինի եթերում կազմակերպված քննարկմանը: Որտեղ նախարար մարդը, փոխանակ բովանդակային հարց ուղղեր ընդդիմության հիմնական ուժի ներկայացուցիչ Արամ Վարդևանյանին, օգտվելով իշխանական լծակներից՝ պեղել էր նրա անցյալը:
Եվ իմացել, որ վերջինս 2017-ին եղել է Հանրապետական կուսակցության անդամ: Ու հարց էր տալիս, թե ինչպես է պատահել, որ ինքը նման փոխակերպումներ է ապրել: Թե ինչու է իմ կողմից հարգված փաստաբանը թաքցրել այդ փաստը՝ չեմ հասկանում: Հատկապես որ այդ ժամանակ ինքը վարչապետի օգնականն էր: Եվ բնական երևույթ էր այդ պաշտոնը գրաված անձի անդամագրվելը Հանրապետականին:
Ինչևէ, ոչ հրապարակային այդ փաստը հրապարակայնացնելով՝ պարոն Արոն շարունակում է «հաղթարշավը»՝ նշելով, որ Վարդևանյանը 2021-ին «Հայաստան» դաշինքի, իսկ հիմա էլ «Ուժեղ Հայաստան» կուսակցության նախընտրական ցուցակում է: Դրանց առումով էլ անբնական բան չեմ տեսնում: Նախկիններին ընդդիմադիր լինելով՝ ես 2021-ին ձայն եմ տվել «Հայաստան» դաշինքին, իսկ երկու օրից էլ ձայն կտամ «Ուժեղ Հայաստան» կուսակցությանը: Որովհետև համարում եմ, որ իմ թանկարժեք քվեն չկորցնելու համար այս պարագայում ոչ թե պետք է ընտրություն կատարեմ ընդդիմության շրջանակում, այլ ձայն տամ այն քաղաքական ուժին, որի շանսերն ամենաբարձրն են Նիկոլին ՀՀ վարչապետի բարդ ու նյարդային պաշտոնից ազատելու և նրան երկարատև «հանգստի» ուղարկելու համար:
Իսկ եթե դիտարկենք Արարատի պաշտոնական կենսագրությունը, ապա չենք իմանա, որ նա ժամանակին դասավանդել է բուհում: Թեկուզ ոչ որպես հիմնական, այլ սեմիանար վարող դասախոս: Եվ, բնականաբար, չենք իմանա, որ ուսանողներին ինչ-որ տեղեկատվություն տրամադրելու համար հեռացվել է բուհից: Թե ինչ տեղեկատվության մասին է խոսքը՝ արդեն մոռացել եմ, քանի որ դա ինձ համար կարևոր չէր: Բայց, որպես գործող իշխանությանն ընդդիմադիր, 2014-ին թե 2015-ին ֆեյսբուքում նախաձեռնել եմ նրա պաշտպանությունը: Դա, դժբախտաբար, որևէ արդյունքի չի հանգեցրել, բայց արել եմ այն, ինչ համարել եմ անհրաժեշտ: Ի դեպ, ինքն իր պաշտպանության առումով վերին աստիճանի պասիվ էր: Ինչը փոխհատուցվում էր կնոջ նույն աստիճանի ակտիվությամբ: Իհարկե, այդ ժամանակ տեղյակ չեմ եղել հետագայում մամուլում տարածված՝ «օմեգա» ծածկանվան հարցի առումով, այլապես ձեռնպահ կմնայի նման նախաձեռնություն իրականացնելուց:
Սակայն Միրզոյան Արարատը երկար չմնաց անգործ, քանի որ նրան աշխատանքի ընդունեցին Հայաստանի զարգացման նախաձեռնություններ» (IDEA) հիմնադրամի «Ավրորա մրցանակ և 100 կյանք» նախաձեռնությունում՝ որպես հետազոտական խմբի ղեկավար: Եթե ոմանք մոռացել են, թե դա ինչ հիմնադրամ էր կամ ինչ նախաձեռնություն, հիշեցնեմ՝ դրանք հիմնադրվել էին երեք սփյուռքահայ բարեգործ գործարարների կողմից: Ու դրանց թվում ամենաակտիվը ռուսաստանաբնակ Ռուբեն Վարդանյանն էր: Այո, այն Վարդանյանը, ով շուրջ երեք տարի տառապում է թշնամական Բաքվի բանտում: Ու ԱԳ նախարարի պաշտոնը զբաղեցնողը ոչինչ չի անում, որպեսզի ոչ թե նույնիսկ նրան ազատելու, այլ գոնե վերջինիս վիճակը թեթևացնելու համար: Մարդկային երախտամոռությունն էլ ինչպե՞ս է լինում՝ կարո՞ղ եք ասել:
Ինքն, իհարկե, կարող է արդարանալ, թե ոչինչ անել չի կարող, որ մեր գերիների հարցը գտնվում է իրեն այդ պաշտոնին նշանակողի ձեռքում: Համաձայն եմ, հարցն, իսկապես, գտնվում է երբեմնի, այն օրերի Արոյի ասելով, «չշշկռվելիք» գերագույն հրամանառարի, իսկ խայտառակ պարտությունից հետո՝ «մեծարգո» վարչապետի ձեռքում: Թե ինչպիսի «չշշկռվելիք» գերագույն էր այդ անձը՝ վերջնականապես տեսանք 2023-ի սեպտեմբերի վերջին: Ինչ մնում է խայտառակ պարտությունից հետո «մեծարգո» կոչմանն արժանանալուն, ապա դա կարող է նորմալ դիտվել միայն ծուռ հայելիների թագավորությունում: Այսինքն, մորօրյա Հայաստանում:
Ինչ մնում է Արարատի ակտիվության երկրորդ պահին, ապա դա «Թրիփփ»-ի վերաբերյալ շրջանակային համաձայնագրի հեռավար ստորագրումն էր Վաշինգտոնից պետքարտուղար Մարկո Ռուբիոյի և Երևանից ԱԳ նախարար Միրզոյան Արարատի կողմից: Ինչն ամերիկյան կողմից ՀՀ գործող իշխանությանն ընտրությունների շեմին աջակցելու հերթական քայլն էր: Չնայած ենթադրում եմ, որ նույնիսկ այդ քայլը և ոչ էլ ՀՀ վարչապետին նվեր արված եվրոպական վերջին ֆինանսական ներարկումը չեն փրկելու Փաշինյան Նիկոլին: Իսկ որպեսզի դա կյանքի կոչվի երկու օրեից՝ պետք է գնալ ընտրատեղամասեր ու ընտրել համար 3-ը կա՛մ համար 7-ը և կա՛մ համար 17-ը: Այսինքն, ոչ թե բոլոր համարները, այլ նշված երեք համարներից որևէ մեկը:
