Ռուսաստանը չի կարող ազդել այս երկրի ընտրությունների վրա, եթե ժողովուրդը կողմնորոշված է

«Հրապարակի» զրուցակիցն է ԵԿՄ անդամ՝ Համլետ Հայրապետյանը:

- Պարո՛ն Հայրապետյան, մտահոգիչ չի արդյո՞ք երկրում տիրող իրավիճակը:

Մտահոգիչ է, որովհետեւ կարծես, թե բանակների են բաժանված՝ Բաղրամյան պողոտա, Հանրապետության հրապարակ: Բաղրամյան պողոտայի առաջին շարքում քայլողները այնպիսի կոչերով են հանդես գալիս, ինձ ջղայնացնում են: Ի՞նչ է նշանակում՝ ես բանակի կողքին եմ: Եթե դու նոր ես բանակի կողքին շատ վատ է, այդ ասողներին եմ ասում: Նախ՝ բանակի կողքին չեն լինում, լինում են բանակի հետ: Մենք որդեգրել ենք, որ մենք «Ազգ-բանակ» ենք, եթե մենք ազգովի բանակ ենք, ինչի՞ ես քեզ առանձնացնում: Ի՞նչ է եղել մեր բանակին, որ կողքին եք: Մեր բանակը ամենակայացած կառույցներից մեկն է, ամենամարտունակ բանակն է տարածաշրջանում: Ես 15 օր կռվել եմ Մարտակերտի տարածաշրջանում, Եղնիկներում, մի թիզ հող չենք տվել: «Ալաշկերտ» ջոկատով ենք գնացել, հրամանատարը՝ Աբելն ա: Կռվել ենք, չենք փախել: Շատ մարդ փախավ, մնայիք կռվեիք, մեռնելը դժվա՞ր բան ա: Ես ապրիլյան քառօրյայում հրամանատար եմ եղել: 3 պատերազմի մասնակից եմ, հիվանդացել եմ, վիրավորվել, բայց մտածել եմ երկրի մասին: Կան քաղաքակիրթ ճանապարհներ, եթե բան ունենք հարթելու, եկեք ընտրենք քաղաքակիրթ ճանապարհը: 

- Արտահերթ ընտրություննե՞րը նկատի ունեք: 

- Ընտրություններն են, ես չգիտեմ արտահերթ է, թե ոչ, բայց ընտրություններն են: Կարծում եմ խորհրդարանական ուժերը այդպիսի որոշում կկայացնեն: Ես էլ եմ մասնակցելու ընտրություններին: Ես մի ընտրատարածքից 20 հազար ձայն եմ տարել եւ առաջին գումարման ԱԺ պատգամավոր եմ եղել: Շատ հնարավոր է, որ մինչեւ ընտրությունները շատ կռված տղաներով, քաղաքականությանը մոտ կանգնած ազգի նվիրյալներով՝ միավորում ստեղծենք, եւ մեր կարգախոսներով, մեր արած գործերն ի ցույց դնելով, գնանք ընտրությունների: 

- 15 օր պատերազմի դաշտում էիք, ինչպե՞ս ստացվեց, որ պարտվեցինք:

- Դավադրություն է տեղի ունեցել, հատուկ ընտրված մարդիկ կային, որ գնում էին դիրքեր, ասում էին՝ հողերը ծախված ա: Հոկտեմբերի 4-ից սկսած այդ գործողությունները գնացել ա: Ես դրանց ծեծել, լարել եմ, բայց էն 18 տարեկան երեխեն շատ գիտի, որ սրանք եկել պանիկա են անում: Ես ինչ -որ տեսել եմ, այն եմ ասում:

- Եթե դավաճանություն է եղել, ինչո՞ւ այսօր որեւէ մեկին մեղադրանք չի առաջադրվել: 

- Այսօր մտմտում են, բայց չեն անում: Հենց դրա համար էլ եմ վրդովված: Այնքան բան կա, որ շատ արագ պետք է հանեն ի ցույց դնեն, ով ինչ է արել, ինչո՞ւ են դավաճանել, ո՞նց եղավ, որ հայը պարտություն կրեց, հա՛յը, ոչ թե բանա՛կը: Բանակը եղել է, կա, ու կլինի եւ դեռ ավելի հզորանալու է: 

- Որքա՞ն ժամանակ է պետք մեզ, որ բանակը հզորանա, ունենա ժամանակակից զինտեխնիկա:

- Ի՞նչ է եղել մեր բանակին, դո՞ւք մտածում եք, որ հուսալքվել են մեր զինվորները: Մենք մարդկային ռեսուրսի, ջիգյարով կռվող, չվախեցող երիտասարդություն ունենք, որոնք այսօր նաեւ զորակոչվում են բանակ: Ուրիշ է, որ մենք քվոտայի խնդիր ունենք: Ապրիլյան պատերազմից հետո, ես մայիսի 13-ին առաջարկություն եմ արել, որ հրատապ ձեւով Հայաստանում պետք է զարգանա ռազմարդյունաբերությունը: Ինձ ասացին, ինչպե՞ս: Ասացի՝ եթե կառավարությունը չի կարող օգնել, օլիգարխներ ունենք, կարելի է գնալ այդ մարդկանց հետ բանակցությունների: Ասել՝ բարեկամ արի, այս արտադրությունը դու դիր, կա  արի այսքան ֆինանսավորի, մենք քեզ արտոնություն կտանք: Ես խորապես համոզված եմ, որ պատրաստ էին այդ գործի համար ֆինասներ դնելու: 

- ԳՇ պետ Օնիկ Գասպարյանը պահանջել է, եւ վճռական է տրամադրված վարչապետի հրաժարականի հարցում: Ի՞նչ կարելի է սպասել այս հայտարարությունից հետո: 

- Ես Օնիկին ճանաչում եմ, նա զորամասի հրամանատար էր, դա 99թվականերին էր: Օնիկին միշտ գնահատել եմ, որպես բանիմաց, խելացի, հրամատար, բայց որ Օնիկը այս աստիճան կշեղվեր իր ուղղությունից, չէի պատկերացնում: Օնիկը չի հասկանում, որ բանակը քաղաքականացված կառույց չի: Կա՛ օրենք, կա՛ Սահմանադրություն, բոլորը պետք է շարժվեն օրենքով եւ Սահմանադրությամբ: Ես համախմբվածության կոչ եմ անում, եթե չհամախմբվեն շատ բան ենք կորցնելու: Այսօր Վազգենի ծննդյան օրն ա, թող շնորհավոր լինի,   ինքն էր ասում. «Մտածեք էս երկրի մասին, մենակ ձեր մասին մի մտածեք»: Թող բոլորը մտածեն, մի օր ամենակարողի առաջ ենք կանգնելու, պատասխան ենք տալու: 

- Օրերս Սասուն Միքայելյանը իր տված հարցազրույցում ասաց, որ երկրապահը հետին պլան է մղվել, ի՞նչ կասեք այս մասին:

- Եթե ասում է ԵԿՄ-ի նախագահը, ես ի՞նչպես կարող եմ հակադարձել, բա թող մտածեն, որտեղի՞ց է եղել սխալը: Ես որպես երկրապահ հպարտ եմ: Ես չեմ լսել հարցազրույցը չեմ ուզում մեկնաբանել: Ես Մանվել Գրիգորյանի տեղակալն եմ եղել: Հերթական համագումարից հետո առաջարկողներից մեկը ես եմ եղել, որ Մանվել Գրիգորյանից հետո ԵԿՄ-ն ղեկավարի Սասուն Միքայելյանը: Մտածել եմ, որ մեծ կապեր ունի: Հասարակական կազմակերպությունները չեն կարող ինքնին գոյատեւել, եւ գործողություններ իրականացնել, պետք է լինի որոշակի հովանավորչական բաներ, ես մտածեցի, որ Միքայելյանը ղեկավարի, այդ բաները տեղի կունենան:

- Դիմտրի Պեսկովը՝ անդրադառնալով ՀՀ երկրորդ նախագահ Ռոբերտ Քոչարյանին, ասել է, որ նա  Ռուսաստանի մեծ բարեկամն է: Չեք կարծո՞ւմ, որ այս կերպ Ռուսաստանը ցանկանում է Քոչարյանին երկրի ղեկավարի պաշտոնում տեսնել: 

- Ես այսպես եմ հասկանում, որ որեւիցէ պետություն կարող է ինչ- որ հովանավորչություն անի անձնական ձեւով մարդու կամ պետության կողմից: Ասենք՝ լավը խոսի անձի մասին, պետությանը օգնի ինչ որ օգնութjուններով, բայց երբեք մի պետություն, թեկուզ Ռուսաստանը չի կարող ազդել այս երկրի ընտրությունների վրա, եթե ժողովուրդը կողմնորոշված է: