Հարցազրույց «Հայաստան» խմբակցության պատգամավոր Արման Ղազարյանի հետ։
- Նիկոլ Փաշինյանն առավոտ կանուխ հրապարակեց «պողպատե մանդատ» գրվածքով երկաթե մուրճի լուսանկարը: Ձեր կարծիքով, սրանով ի՞նչ ուղերձ է ուզում փոխանցել հանրությանը, ընդդիմադիրներդ վախեցե՞լ եք, որ այդ «բանտիկով մուրճը» շուտով կսկսի նոր թափով կիրառել։
- Ես, ճիշտն ասած, նոր իմացա, որ նման լուսանկար է հրապարակել, բայց ես անձամբ մտահոգ չեմ, չգիտեմ՝ իր մտքինն ինչ է, ինչ մեսիջ է դրանով փոխանցում, բայցեւայնպես, ես կրկնում եմ՝ մտահոգություն չունեմ ո՛չ իր պողպատե մանդատից, ո՛չ էլ մուրճից։ Իսկ գուցե էդ պողպատե մանդատն իր թիմի՞ն է վերաբերում։
- Նախորդ նստաշրջանում Ձեր գործընկեր Արթուր Սարգսյանին կալանավորեցին, երկու պատգամավորի էլ` Արծվիկ Մինասյանին ու Սեյրան Օհանյանին, անձեռնմխելիությունից զրկեցին, գուցե Փաշինյանը հասկացնո՞ւմ է՝ խելոք մնացեք, թե չէ ձեզ էլ կտանեմ։
- Մենք ոչ իրավական երկրում ենք ապրում, ամեն ինչ էլ հնարավոր է, չկա դատաիրավական համակարգ, այն ձեւական է, մեկ անձի թելադրանքով են շարժվում վերեւից ներքեւ, շինծու գործեր են, որոնք էլ վճիռներ են դառնում։ Իրենք առաջին օրվանից նախընտրական քարոզչություն են անում՝ պոպուլիզմով, շոուներով: Էլի են ուզում անել, բայց ժողովուրդը խելքի է եկել, ժողովուրդն իրենց չի հավատում, իրենց մաշկի, հողի վրա զգացել են դրանց ստերը։
- Ուզում եք ասել, որ «նախկին թալանչիներ» շոուն էլ չի՞ աշխատում:
- Ամենամեծ նախկինն իրենք են, ութը տարին նախկին չի՞, նախկինների կառավարման ժամկետից մի քիչ էլ ավել են, հիմա նախկին-ներկան ինչպե՞ս է որոշվում, պիտի 100 տարի աշխատե՞ն, որ նախկին դառնան։
- Քանի իրենք իշխանության են, նախկինը դուք եք։
- Ես էլ ասում եմ ՝ իրենք մեզնից նախկին են։
- Խորհրդարանական աշխատանքներն աշնանային նստաշրջանում բավականին համերաշխ են ընթանում, հնարավո՞ր է ձեր գործընկերների ճակատագրից եք վախեցել, ավելի զուսպ եք դարձել, այն պարագայում, երբ ասում եք` միջանցքի մասին է համաձայնագիր ստորագրվել։
- Դեռ նոր են սկսվել նիստերը, հիմնական պրոցեսը դեռ առջեւում է, կտեսնեք, կհետեւեք, որ մտահոգվելու բան չունենք։
- Խոսքը քաղաքական գործընթացների մասին է, օրինակ, իմպիչմենտ, փողոցային պայքար։ Ամեն ինչ լա՞վ է, որ այստեղ այսքան լավ է ու խաղաղ։
- Դե, իմպիչմենտի թեման բազմիցս ենք քննարկել, կարծիքներ հայտնել, ֆրակցիան է որոշում հայտնել: Ինչ վերաբերում է ամենօրյա պայքարին, մենք ամենօրյա պայքարի մեջ ենք, միայն փողոցային պայքարը չէ պայքարի տեսակ, այլ սրանց անօրինությունները ժողովրդին ցույց տալը, ժողովրդի աչքերը բացելը նույնպես քաղաքական պայքարի մի ձեւ է։ Մենակ փողոցը չէ կարեւոր, կյանքը ցույց է տվել, որ իրենք ոստիկանական ուժերով կարող են ճնշել, բռնել, քաղբանտարկյալների թիվն ավելացնել։ Պետք է ճիշտ տակտիկա ընտրվի, որպեսզի հնարավորինս քիչ մարդկային կորուստներով, նկատի ունեմ` դատվածությունը, կարողանանք մեր բուն նպատակին հասնել եւ հեռացնել այս իշխանություններին։
- Ճի՞շտ հասկացա, որ գնում եք ընտրությունների՝ հերթական, թե արտահերթ։
- Ցանկացած ընտրովի մարմին ընտրությունից հետո եթե ցանկություն ունի շարունակել քաղաքական գիծը, պետք է պատրաստվի հաջորդ ընտրության։
