«Երեկ վաղ առավոտից Սոթքի հանքավայրի աշխատանքները վերականգնվել են։ Աշխատանքներն այս պահին ընթանում են բնականոն հունով։ 35-ամյա Արմեն Մաթևոսյանը, ով թշնամու կողմից վիրավորվել էր, բավականին ծանր վիրահատություն է տարել։ Այդ պահին մեկնաբանել էի, որ թևից է ստացել վիրավորումը, սակայն իրականում գնդակը 3 մմ հեռավորությամբ սրտի կողքով անցել էր և թևով դուրս եկել։ Բարեբախտաբար, ներքին օրգանների վնասվածք չունի։ Այս պահին բժիշկները վիճակը գնահատում են կայուն։ Աստծո կամքով է փրկվել մեր աշխատակիցը։ Արմեն Մաթևոսյանը տոհմական հանքագործների ընտանիքից է։ Պապերը վաղուց Արցախից տեղափոխվել են Վարդենիս, և, փաստորեն, 3 սերունդ աշխատում է Սոթքի հանքավայրում։ Տվյալ պահին և հայրն է հանքավայրի աշխատակից, և հորեղբայրը, և Արմենը»- այս մասին Hraparak.am-ին ասաց «Գեո Պրո Մայնինգ» ՍՊԸ-ի պաշտոնական ներկայացուցիչ Ռուզաննա Գրիգորյանը։
Մեր զրուցակցի խոսքով, սա մի նոր իրականություն է, որին իրենք սովորել են և որի շրջանակում ապրում ու աշխատում են։
«Սա առաջին դեպքը չի, ինչպես գիտեք։ Արդեն ունենք դիմադրողականություն։ Աշխատակիցները խուճապի մատնված չեն, տրամադրված են շատ խիզախ, շատ տոկուն և աշխատանքային տրամադրությամբ»,-ասաց Ռուզաննա Գրիգորյանը։
Հիշեցնենք, որ մայիսի 6-ի երեկոյից սկսած` թշնամին կրակ էր բացել Սոթքի հանքավայրի ուղղությամբ։ Հաջորդ օրվա կեսօրից սկսած՝ ինտենսիվ կրակահերթ, որի արդյունքում ծանր հրազենային վիրավորում էր ստացել հանքավայրի աշխատակիցը։
