«Քիչ առաջ Խարկովի մարզի Խարկով քաղաքում գտնվող Սուրբ Հարություն հայ առաքելական եկեղեցում հանդիպում է տեղի ունեցել Ուկրաինայում հայ առաքելական եկեղեցու ուկրաինական թեմի առաջնորդ Սրբազան Մարկոս Հովհաննիսյանի, Հայաստանի Հանրապետության դեսպան Վլադիմիր Կարապետյանի, Ուկրաինայում հայերի միության փոխնախագահ Դավիթ Մկրտչյանի, և տեղի հայ համայնքի հետ»,-այս մասին Հրապարակին ասաց Ուկրաինայում հայերի միության փոխնախագահ Դավիթ Մկրտչյանը։
Փոխնախագահն իր ելույթում ողջույնի խոսք է փոխանցել Ուկրաինայի հայերի միության նախագահ Վիլեն Շատվորյանի անունից, ով պատերազմի առաջիկա օրերից Խարկով քաղաքի և մարզի համար կանգնած են եղել որպես օգնություն հատկացնող ուժ։ Ողջույնի խոսքում Մկրտչյանը փոխանցել է նաև համայնքի ղեկավարի պատրաստակամությունը՝ հետագայում օգնելու, օժանդակելու Խարկովում մնացած համայնքի անդամներին։
Դավիթ Մկրտչյանի խոսքով հանդիպման ժամանակ Ուկրաինայում Հայաստանի դեսպանը անդրադարձել և խոսել է Ուկրաինայում պատերազմի ամբողջ ընթացքում իրենց կատարած աշխատանքների և դրանց ծավալների մասին։ Խոսել է առկա խնդիրների և դրանց հավանական լուծումների մասին ։
Դավիթ Մկրտչյանը նշեց նաև, որ Սրբազան հայրը եկեղեցում կատարել է ժամերգություն, որտեղ անդրադարձել է պատերազմի ժամանակ զոհված հայ և օտարազգի քաղաքացիներին։ Իր աղոթքի մեջ անդրադարձել է նաև բոլոր նրանց, ովքեր դիմադրել են այս պատերազմը և դուրս չեն եկել երկրից։ Ըստ Մկրտչյանի հանդիպումը սպասված է եղել, քանի որ այն տեղի է ունեցել երկրում տիրող պատերազմական պայմաններում և ոգևորել է մարդկանց։
