«Հրապարակ». Հայ ոստիկաններն ասացին, որ 50 մետր ներքեւ էլ ռուսներն են կանգնեցնելու

Ադրբեջանցի ֆեյք բնապահպանների կողմից Լաչինի, իսկ ավելի ճիշտ՝ Բերձորի միջանցքը փակելուց հետո «Հայաստան» խմբակցության երեք պատգամավոր ուղեւորվել էին դեպքի վայր՝ ամեն ինչ սեփական աչքերով տեսնելու համար՝ մեզ ասել էր ՀՀ ԱԺ «Հայաստան» խմբակցության ղեկավար Սեյրան Օհանյանը:

Գործողությունների վայր էին մեկնել պատգամավորներ Գառնիկ Դանիելյանը, Գեղամ Մանուկյանը եւ Արթուր Խաչատրյանը: «Հրապարակը» զրուցեց Արթուր Խաչատրյանի հետ:

- Ուղեւորվել էիք Լաչինի միջանցք, կարողացա՞ք տեղ հասնել եւ տեղում ինչի՞ ականատես եղաք:

- Մեզ ճանապարհին կանգնեցրին հայ ոստիկաններն ու ասացին, որ դրանից 50 մետր ներքեւ արդեն ռուսներն են փակել:

- Հայ ոստիկաննե՞րը, թե՞ ԱԱԾ սահմանապահ ուժերը:

- Ոստիկանական ուժերն էին: Հասանք շատ ուշ, բայց շատ տեղեկություններ չկարողացանք հայթայթել, լսեցինք այն, ինչ լսել էինք: Լրացուցիչ տեղեկություններից ավելի, որոնք հասանելի են հանրային տիրույթում, հայթայթել չկարողացանք:

- Ընդդիմությանը քննադատում են, ասում են՝ թող խորհրդարանական ընդդիմությունը գնա, հասնի տեղ ու ցույց տա միջազգային հանրությանը, որ տեսեք՝ մեզ չեն թողնում անցնել: ՄԱԿ-ում երեկ Ռուսաստանի ներկայացուցիչը հայտարարեց, որ միջանցքը կիսով չափ բաց է:

- Ճանապարհը փակ է, ի՞նչ է նշանակում՝ կիսով չափ բաց է: 

- Նկատի ունեն, որ իրենք մեքենաներով հումանիտար ինչ-որ բեռներ են որոշ չափով անցկացրել՝ ՄԱԿ-ի հովանու ներքո: Հավանաբար, կիսով չափ ասելով՝ դա նկատի ունեն։

- Համենայնդեպս, այդ կիսով չափ բաց ճանապարհից մի մարդ դեռ չի կարողացել անցնել, ոչ իրենց զինվորականներից, նույնիսկ Արցախի արտգործնախարարի ժամանակավոր պաշտոնակատարը դեռ Հայաստանում է:

- Ձեզ ուղղված այս քննադատություններին ինչպե՞ս կհակադարձեք:

- Գիտեք, ընդդիմությունը գնար, չգնար, մի հոգով գնար, տասը հոգով գնար՝ այդ քննադատությունը լինելու է, քննադատում են մարդիկ, ովքեր առիթ են փնտրում:

- Բայց այդ քննադատության մեջ ճշմարտության հատիկ չկա՞:

- Էլի եմ ասում՝ այսօր էլ շարժվենք դեպի Գորիս, չկարողանանք անցնենք, հետ դառնանք, էլի պիտի քննադատեն, չգնանք՝ էլի պիտի քննադատեն, քննադատում են նրանք, ովքեր քննադատելու ցանկություն եւ շահ ունեն:

- Եթե հրաժարվեիք ոստիկանների պահանջին ենթարկվել, կձերբակալեի՞ն ձեզ:

- Տրամաբանություն չկար անցնել, երբ 50 մետր հետո ռուսներն էին կանգնած:

- Թող ռուս խաղաղապահները պահանջեին կանգնել՝ դուք էլ հրաժարվեիք:

- Ցանկացած գործողություն պետք է որեւէ նպատակի միտված լինի:

- Պատրաստվո՞ւմ եք նորից գնալ Լաչինի միջանցքի կողմը:

- Այդ հարցը քննարկվում է, ֆորմատի հարցն է քննարկվում:

- Այսինքն՝ հնարավոր է ողջ խմբակցությո՞ւնը գնա:

- Դե ոչ 29 հոգով, իհարկե: Կապ չունի՝ 10 հոգով, 15 հոգով, կարող է մի հոգի լինի: Ուժով ոստիկանական կարդոնը ճեղքել-անցնել, հետո մտնել, ռուսականը ճեղքել անցնել՝ նման խնդիր չկա: Ճանապարհը փակ է, դու լինես Գորիսում, թե Երեւանում, թե Շամշադինում՝ ճանապարհը փակ է:

- Ստացվում է, որ ռուս խաղաղապահներն են ճանապարհը փակել:

- Չէ, ռուսներն ասում են՝ գնաք այնտեղ՝ ադրբեջանցիները կոնֆլիկտ կհրահրեն, անվտանգությունը երթեւեկության չենք երաշխավորում: Հիմա ասել, թե՝ ջհանդամ թե չեք երաշխավորում, ես իմ ռիսկով եմ գնում՝ երեխայություն է: 

- Ռուսական կողմի այդ զգուշությունն արդյոք նշանակո՞ւմ է, որ ցուցարար ադրբեջանցիների մեջ զինված մարդիկ կան:

- Չեմ կարող ասել, դա փաստ է, ես նման բան չգիտեմ, փաստ է, որ դա կազմակերպված է իրենց պետության կողմից, իրենց, այսպես կոչված, բնապահպանական պահանջներին հետեւել են նաեւ քաղաքական պահանջներ։

- Հայկական կողմը կարողացա՞վ արդյունավետ օգտագործել ադրբեջանցիների կողմից հումանիտար այս աղետի փաստական հանգամանքը:

- Ոչ, եթե հայկական իշխանությունների մեջ մի քիչ պատասխանատվություն մնացել է երկրի, քաղաքացիների նկատմամբ, իրենք պետք է օգտվեն եւ Արցախի կարգավիճակի հարցն էլի վերադարձնեն միջազգային հարթակ: Մանավանդ Ֆրանսիայի խորհրդարանն է խոսել, եթե չեմ սխալվում՝ Իռլանդիան է այդ մասին երեկ խոսել, պետք է օգտվեն եւ այդ հարցը վերադարձնեն միջազգային օրակարգ ու առաջ մղեն՝ «ճանաչում՝ հանուն փրկության» բանաձեւը: Այն, ինչ որ իրենք խոսք են տվել, այն խոստումով, որով իրենք իշխանություն են ընտրվել, եթե իրենց մեջ մի քիչ պատասխանատվություն եւ կամք է մնացել եւ, իհարկե, պարկեշտություն, իրենք պետք է այս առիթից օգտվեն:

- Իսկ ՄԱԿ-ում Ռուսաստանի ներկայացուցչի խոսքը Ձեզ վրա ի՞նչ տպավորություն թողեց:

- Ռուսաստանն ի՞նչ է ասել, ասել է՝ մենք բանակցում ենք, հույս ունենք՝ կբացվի, բայց որ մենք Ռուսաստանից կտրուկ քայլեր ենք ակնկալում՝ դա անվիճելի է: