Չնայած Մելիքսեթ Պողոսյանը դեռ շարունակում է զբաղեցնել Սյունիքի մարզպետի պաշտոնը եւ առավել, քան երբեւէ, ակտիվ շրջայցեր է կատարում մարզի սահմանային համայնքներ՝ թերեւս փորձելով կանխել իր պաշտոնանկության գործընթացը, սակայն մարզպետի պաշտոնի հավակնորդներից ոմանք իրենց արդեն մարզպետ են զգում, ակտիվ հանդիպումներ կազմակերպում մարզի ակտիվի հետ: Խոսքը հատկապես ՔՊ-ական պատգամավոր, Կապանի համայնքապետի թեկնածու, նկարիչ Դավիթ Դանիելյանի մասին է:
Սյունիքի մեր աղբյուրներն ասում են, որ նա, դեռ չնշանակված, արդեն աշխատանքի խոստումներ է տվել սյունեցիներին, անգամ խոստանում է ԶՊՄԿ-ում բարձր աշխատավարձով աշխատանք: Բանն այն է, որ օրերս փոխմարզպետի պաշտոնից կոմբինատի խորհրդի անդամ նշանակված Նարեկ Բաբայանը նրա բարեկամն է: Իսկ Դանիելյանի թեկնածությունը մարզպետի պաշտոնում, մեր աղբյուրների հավաստմամբ, մի կեսբերան քննարկվել է` այն բանից հետո, երբ ՔՊ ակտիվն ընդդիմացել է Կարեն Համբարձումյանի տարբերակին: Հնարավոր է անգամ հարմար թեկնածուի բացակայության պատճառով գործող մարզպետին փոխելու մտքից հետ կանգնեն: Երեկ Կարեն Համբարձումյանից հետաքրքրվեցինք` հնարավո՞ր է, որ իրեն նշանակեն: «Չեմ ասի»,- կտրեց պատգամավորը:
