«Հրապարակի» զրուցակիցը «Լուսավոր Հայաստան» կուսակցության անդամ Դավիթ Խաժակյանն է:
- Իշխանություններն ուզում են այնպիսի օրենսդրական փոփոխությունների գնալ, որպեսզի թույլ չտան՝ նոր կուսակցություններ հիմնադրվեն մեզանում, այդ կուսակցությունները մասնակցեն ընտրություններին, ֆինանսավորողներ ունենան եւ այլն: Ընտրական օրենսգրքում ՔՊ-ական իշխանությունը փոփոխություններ առաջին անգամ կատարեց երկու տարի առաջ, սակայն այդ փոփոխությունները կարծես կյանքի չեն կոչվել, երեւի սպասում են, որ վճռական պահին կիրառեն: Տեղյա՞կ եք` ի՞նչ փոփոխություններ են արվել, ինչն են կիրառել, ինչը՝ ոչ:
- Ասեմ, որ արդեն իսկ ահագին փոփոխություններ կիրառվել են: Հավանաբար, նոր փոփոխություններ էլ են նախատեսում, սակայն եղած փոփոխություններից մի քանիսը կիրառում են արդեն իսկ: Դրանք հիմնականում վերաբերում են կուսակցություններին, որոնց պարտադրում են ներկայացնել հաշվետվություն: Փոփոխությունները միտված են նաեւ կուսակցությունների ֆինանսական միջոցներին: Պարտադրում են ֆինանսական միջոցները ներկայացնել Կենտրոնական ընտրական հանձնաժողով, ասում են, որ կուսակցությունների կանոնադրությունները պետք է համապատասխանեն կուսակցությունների մասին նոր օրենքին, հակառակ դեպքում կառաջանան կուսակցությունը չգրանցելու հիմքեր եւ այլն: Իշխանություններն ուզում են նաեւ նոր փոփոխություններ իրականացնել, որոնք կվերաբերեն կուսակցությունների գրանցման սահմանափակումներին:
- Իսկ այդ հաշվետվությունները, որոնք կուսակցությունները ներկայացնում են ԿԸՀ, ի՞նչ են ենթադրում իրենցից:
- Դրանք բավականին բարդ մեխանիզմներ են, որոնք կապված են կուսակցությունների ֆինանսավորումների, հայտարարագրումների հետ: Կուսակցության ղեկավար մարմնի բոլոր ներկայացուցիչներն այժմ պարտավոր են եկամուտների մասին հայտարարագիր ներկայացնել Կոռուպցիայի կանխարգելման հանձնաժողով, ինչպես նաեւ՝ կուսակցությունն ինքը պետք է ունենա հայտարարագիր եւ ամեն տարի աուդիտ անցնի: Այս ամենին հետեւելը պարտադիր պայման է նաեւ խորհրդարանական ընտրություններին մասնակցելու համար: Սրանք գործընթացներ են, որոնք դժվարացնում են կուսակցության աշխատանքները եւ հավելյալ խնդիրներ են առաջացնում:
- Նիկոլ Փաշինյանն արդեն իսկ ակնարկել է, որ նոր փոփոխություններ է նախատեսում այս ոլորտում: Ձեր կարծիքով` դրանք ո՞ւմ դեմ են ուղղված: Կոնկրետ ո՞ր ուժին են փորձում խանգարել, գուցե, որ ընտրություններին չկարողանան մասնակցել կամ մասնակցությունը չեղարկել, այնպես, ինչպես արվեց Մոլդովայում:
- Նիկոլ Փաշինյանը տեսնում է, թե ինչ պատկեր է ձեւավորվում 2026-ի խորհրդարանական ընտրություններից առաջ: Նա տեսնում է, որ իշխանությունը կորցնելու վտանգը շատ մոտ է: Գիտակցում է, որ ավելի լավ է որոշ ուժերի մասնակցությունն ընտրություններին թույլ չտա, քան թե կորցնի իշխանությունը: Այս ամենն ավելի շատ «Մեր ձեւով» շարժման դեմ է: Ամեն կերպ փորձում են խոչընդոտել Սամվել Կարապետյանի ուժին: Իշխանությունը տեսնում է, որ նրանց վարկանիշը, ի տարբերություն իր վարկանիշի, աճում է, եւ փորձում է ոչ լեգիտիմ ձեւերով պայքարել նրանց դեմ:
- Եթե որոշվի, որ նոր կուսակցությունների գրանցումն արգելվում է, ապա չկա՞ այլ եղանակ՝ ընտրություններին մասնակցելու, օրինակ՝ ինչ-որ մի այլ կուսակցության միջոցով….
- Երկու խոչընդոտ կա իրականում: Արդարադատության նախարարությունը նախ պետք է գրանցի կուսակցություն, մյուս խնդիրը ԿԸՀ-ն է: Իշխանությունները փորձելու են այս երկու ինստիտուտների մասով ստեղծել խոչընդոտներ: Նիկոլ Փաշինյանի ակնարկները, կարծես, հենց դրան էին միտված: Իշխանությունները փորձում են մանիպուլացնել՝ նշելով, որ երկքաղաքացի անձն իրավունք չունի պատգամավոր կամ նախարար դառնալ, ինչպես նաեւ չունի իրավունք՝ երկրի ներսում քաղաքականությամբ զբաղվելու: Դա աբսուրդ է: Որեւէ կերպ չի կարող համարվել սահմանափակում: Բայց չէ՞ որ Սամվել Կարապետյանն այս ուժի առաջնորդն է, սակայն ոչ առաջին համարը: Սա փոխում է իրավիճակը, սակայն ՔՊ-ն իրավիճակը տանում է հակասահմանադրական ֆորմալացման ճանապարհով:
