Այս ամռանը Մաշտոցի պուրակում մի շարք քաղաքական գործիչներ եւ ակտիվիստներ վրան էին փորձում տեղադրել եւ մարդկանց կոչ էին անում՝ դուրս գալ փողոցային պայքարի: «Քաղաքացու որոշում» կուսակցության գործադիր մարմնի նախկին քարտուղար Սուրեն Սահակյանն այդ օրերին մեզ հետ զրույցում նշել էր, որ այսօրվա ընդդիմությունն ինքն է, եւ իր հետ պետք է հասարակությունը դուրս գա պայքարի: Սահակյանն ու իր համախոհները, պարզվում է, չեն հրաժարվել պայքարից: Երեկ «Զանգ» նախաձեռնությունը, որի անդամ է Սուրեն Սահակյանը, իր էջում հայտարարեց, որ պետք է վերադառնալ փողոցային պայքարի, ընդդեմ ստի եւ նվաստացման։ «Շուտով մենք կվերադառնանք փողոց՝ ընդդեմ ստի ու նվաստացման, հանուն որոշելու մեր իրավունքի ու իրական խաղաղության: Եվ եթե դուք էլ լինեք մեր կողքին, եթե դուք էլ պաշտպանեք տան ու պետության սիմվոլ վրանը, մեզ ոչ ոք չի կանգնեցնի ո՛չ Հայաստանում, ո՛չ դրա սահմաններից դուրս»,- ասված է նրանց հայտարարության մեջ: Մենք զրուցել ենք Սուրեն Սահակյանի հետ:
- «Զանգ» նախաձեռնությունը կոչ է անում՝ դուրս գալ փողոց, պայքարել ստի, կեղծիքի եւ նվաստացման դեմ: Ի՞նչ պայքարի մասին է խոսքը, ե՞րբ եք պատրաստվում տալ դրա մեկնարկը:
- Որոշ ժամանակ առաջ էլ՝ ամռանը, Մաշտոցի պուրակում մենք քննարկումներ ենք նախաձեռնել եւ խոսել ենք այն մասին, թե ինչպես պետք է լուծել Հայաստանի առջեւ ծառացած խնդիրները: Ավելի քան 50 օր մենք նման քննարկումներ ենք իրականացրել, ձեւավորել ենք նախաձեռնող խումբ եւ այս ընթացքում մեկուկես ամիս առաջ նախագծել նոր պայքարի պրոցես:
- Ըստ Ձեզ` հասարակությունն այսօր պատրա՞ստ է փողոցային պայքարի դուրս գալ: 2020 թվականից ի վեր մենք տեսնում ենք մի շարք ձախողված փողոցային պայքարի փորձեր:
- Անկախ նրանից՝ մեր հասարակությունը պատրաստ է պայքարի, թե ոչ, կարծում եմ, որ կրիտիկական վիճակ է Հայաստանում ստեղծվել: Այսօր ինչ-որ բան անելուն այլընտրանք չկա: Այս պարագայում` կա՛մ պայքարել, կա՛մ չլինել․ սա է իրականությունը: Եթե մարդիկ փողոց դուրս չգան, ոչ մի լավ բան չի կարող լինել, եւ ես Հայաստանի համար այդ պարագայում շատ վատ կանխատեսումներ ունեմ:
- Ի՞նչ կանխատեսումներ:
- Արեւմտյան Ադրբեջանի կոնցեպտը, Հայաստան ադրբեջանցիների վերադարձը… Նման քննարկումներ են, խնդիրը սա է: Մենք վտանգը ժամանակին զգալու մեծ խնդիր ունենք: Այսինքն` ինչպես Արցախում, այնպես էլ այստեղ, վտանգը մեր քթի տակ, մենք ոչինչ չենք անում: Արցախում էլ պատերազմից հինգ էր պակաս, բայց մարդիկ պաշտոնների համար կռիվ էին անում: Մենք չենք կարողանում փաստացի վտանգները ժամանակին զգալ ու դրանք կանխել: Եթե այդպես շարունակենք, մեր գործերը չեն կարող լավ լինել: Ուզենք, թե ոչ՝ պետք է փողոց դուրս գանք, պետք է փոխենք Հայաստանի քաղաքականությունը, պետք է այնպես անել, որ այն մեր երկրի առաջ ծառացած խնդիրներին առավել համահունչ դառնա:
- Խորհրդարանական ընդդիմությունը եւս պարբերաբար փողոցային պայքարի է դուրս գալիս: Ո՞րն է Ձեր եւ նրանց պայքարի ռազմավարության տարբերությունը:
- Ես` ինքս, 2018-ի հեղափոխության մասնակից եմ, բայց ինձ համար վաղուց ջնջվել են այն սահմանները, որոնք կային առաջ: Մեր առջեւ ծառացած խնդիրներն ընդհանուր են` բոլորիս համար: Ես չէի առանձնացնի մեզ ու կասեի` ով գիտակցում է պահի կարեւոր լինելը եւ ով ցանկանում է հետագայում եւս ապրել Հայաստանում` անկախ Հայաստանում, պետք է պայքարի դուրս գա: Ցանկացած շարժման դեպքում ամենակարեւորը նպատակներն են: Երբ նպատակը միտված է լինում իշխանափոխությանը, դա ժողովուրդը շատ լավ հասկանում է: Եթե նպատակն իրոք հանրային շահին ծառայելն է, ապա կարծում եմ, որ արձագանք կլինի: Ես հույս ունեմ, որ մարդիկ ճիշտ կգնահատեն պայքարի նպատակները:
- Ո՞րն է ձեր պայքարի նպատակը՝ իշխանափոխությո՞ւնը:
- Ոչ, իշխանափոխությունն ընդամենը փոքր բան է: Մենք ուզում ենք Հայաստանի քաղաքականությունը փոխվի, մենք ուզում ենք իրավունքներ զիջելու քաղաքականություն այլեւս չլինի, հենց դա է բերել անդադար կորուստների:
- Այսինքն` եթե Փաշինյանը համաձայնի փոխել իր վարած քաղաքականությունը, դուք նրան դեմ չե՞ք լինի, չե՞ք պահանջի նրա հեռացումը:
- Ոչ, Նիկոլ Փաշինյանն իր հինգ տարվա գործունեության ընթացքում մեզ համոզել է, որ իրեն ոչ մի դեպքում չի կարելի վստահել, անգամ այն դեպքում, երբ խոստանա, որ չի անի բաներ, որոնց դեմ ենք: Նա սպառել է իրեն: Մնացածը ժողովուրդը կորոշի:
- Իսկ ինչո՞ւ պայքարի մեկնարկի հստակ օրը նշված չէ: Ե՞րբ եք պատրաստվում դուրս գալ փողոցային պայքարի:
- Հիմա կխուսափեմ օր նշելուց:
- Ո՞վ է ձեր պայքարի առաջնորդը:
- Չի կարող փողոցային պայքարն ունենալ առաջնորդ: Քաղաքացիական պայքարի առանձնահատկությունը հենց դա է:
- Բայց 2018-ի հեղափոխության առաջնորդը Նիկոլ Փաշինյանն էր:
- Այո, ճիշտ եք, բայց մեր պարագայում այլ է: Մենք ո՛չ կրոնական քարոզիչ ենք, ո՛չ էլ կուսակցականներ: Ի դեպ, եթե նախքան 2018-ի ապրիլի 24-ը մարդկանց ասեիք, որ Նիկոլ Փաշինյանն է դառնալու առաջնորդ, նրանք ուղղակի կծիծաղեին:
