«Ադրբեջանը աջակցում է եռակողմ բրյուսելյան գործընթացին՝ Եվրոպական միության, Ադրբեջանի և Հայաստանի ձևաչափով՝ Եվրամիության խորհրդի նախագահ Շառլ Միշելի մասնակցությամբ, ինչպես նաև տարածաշրջանային խաղաղության օրակարգին․ այս առումով Ադրբեջանը հանդես է եկել խաղաղության բազմաթիվ նախաձեռնություններով, ներառյալ՝ խաղաղության պայմանագիրը»: Այս մասին «X» հարթակում հայտարարել է Ադրբեջանի նախագահի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևը։
«Ելնելով նրանից, որ եղբայր Թուրքիային՝ տարածաշրջանային երկրին, հնարավորություն չտրվեց՝ մասնակցելու հնգյակի (Ադրբեջան, Հայաստան, Եվրամիություն, Ֆրանսիա և Գերմանիա) ձևաչափին՝ չնայած տարածաշրջանում Ֆրանսիայի կողմնակալ և ռազմականացման քաղաքականությանը, քայլեր, որոնք վնասում են Հարավային Կովկասում տարածաշրջանային խաղաղությանն ու կայունությանը և վտանգում են Հարավային Կովկասում Եվրամիության քաղաքականությունը, նաև հաշվի առնելով պաշտոնական Բաքվի հաստատակամությունը․ Ադրբեջանը որոշեց չմասնակցել Գրանադայի հանդիպմանը»,-գրել է Ալիևի օգնականը։
