Պարեկայինի հրամանատարին ծեծել են մոտ 20 հոգով. նոր մանրամասներ

Գեղարքունիքի մարզում երեկ ծեծի էր ենթարկվել ՀՀ Ներքին գործերի նախարարության Ոստիկանության Պարեկային ծառայության Արագածոտնի մարզի գումարտակի հրամանատար Արտյոմ Սահակյանը: «Հրապարակ»-ին հայտնի են դարձել նոր մանրամասներ: Մեզ պատմեցին, որ դեպքը տեղի է ունեցել Սևանի «Կարապ» լողափում: Սահակյանը` ընտանիքի հետ հանգստանալիս է եղել: Նույն վայրում մի խումբ անձինք բարձրաձայն խոսել ու հայհոյել են: Սահակյանի որդին նրանց դիտողություն է արել, որից հետո լեզվակռիվ է սկսվել: Գումարտակի հրամանատարը, որ այդ ժամանակ եղել է արձակուրդում, քաղաքացիական հագուստով, փորձել է սաստել, կանխել միջադեպը: Իրավիճակը թեժացել է, շուրջ 20 հոգի հարձակվել են հոր և որդու վրա ու խմբակային ծեծի ենթարկել: 

Քննչական կոմիտեից «Հրապարակ»-ին հայտնեցին, որ քրեական վարույթ է նախաձեռնվել` մի խումբ անձանց կողմից խուլիգանություն կատարելու եւ ծեծի հատկանիշներով: Մեկ անձ ձերբակալված է, նախաքննությունը շարունակվում է, միջոցառումներ են ձեռնարկվում «առերեւույթ հանցագործություն կատարող անձանց հայտնաբերելու ուղղությամբ»: 

Սահակյանը դեպքից հետո հոսպիտալացվել է, ժամեր առաջ դուրս գրվել հիվանդանոցից: