Էջմիածնի քաղաքապետարանից բազմազավակ մորն առաջարկում են երեխաներին հանձնել մանկատուն

Էջմիածնի բնակիչ Հայկուշ Ֆռնզյանը իր 6 անչափահաս երեխայի հետ անօթևան դառնալու վտանգի առջև է կանգնած։

Կնոջ 2 երեխան առողջական լուրջ խնդիրներ ունեն, 7 տարեկան տղայի գլուխն ընդհանուր 12 անգամ արդեն վիրահատել են, վերջինը` ամիսներ առաջ։

Հայկուշն աշխատում է Էջմիածնի քաղաքապետարանում. գիշերները փողոցներն է մաքրում։

Նա մեզ հետ զրույցում ասաց. «Մեծ տղաս հաշմանդամություն ունի, մյուս երեխաս էլ բրոնխների հետ կապված խնդիր ունի։

Արդեն 21 տարի է այստեղ ենք ապրում, ամուսին չունեմ, բաժանված եմ։ Նախկին ամուսնուս տեղը չեմ էլ իմանում։ Հիմա վարձով եմ մնում, գիշերը գնում եմ, առավոտ` գալիս։ Հիմա չեմ կարողանում տան վարձը վճարել»։

Կնոջ  խոսքով` դիմել է Էջմիածնի քաղաքապետարան` խնդրանքով, որ իրեն կացարան կամ վագոն֊տնակ տրամադրեն, սակայն մերժել են` առաջարկելով երեխաներին տանել մանկատուն. «Դիմել եմ քաղաքապետարան, որ գոնե փակովի տարբերակով դոմիկ ձեռք բերեմ, իրենք ոչ մի բան չեն ասում, ասում են` չես կարում պահես, հատուկ կենտրոններ կան, տար, էրեխեքիդ հանձնի... Իմ էրեխեքը հաճախակի բացակայել են դպրոցից, որ փոքրերին նայեն, ես ցերեկները այլ տեղ էլ աշխատեմ, ասում են` էրեխեքիդ հաշվին ես ապրում, կվերցնենք, կտանենք մանկատուն։
Քաղաքապետարանը գցում ա Սոցապի վրա, Սոցապը` քաղաքապետարանի։ Ասում եմ` ինձ մի տեղ տվեք, հիմա չեմ կարում ապրեմ, ձեր գիշերային աշխատողն եմ։ Իմ մի էրեխեն ցնցվող երեխա ա, պետք ա նայեմ։ Ես մենակ եմ մնացել իմ էրեխեքի հետ»։

Մենք փորձեցինք զանգահարել համայնքապետարան, սակայն մեր զանգերին չպատասխանեցին։

Նշենք, որ հարցի կապակցությամբ նամակ ենք գրել Էջմիածնի քաղաքապետ Դիանա Գասպարյանին. պատասխան ստանալու դեպքում այն կհրապարակենք։