Լավով դիմում գրեք, հեռացեք

Երեկ առավոտից Արարատի մարզում ռեպրեսիաներ է սկսել մարզպետ Ռազմիկ Թեւոնյանը. նա առանձին-առանձին իր մոտ է կանչում մարզի ՀՀԿ-ական գյուղապետերին, հատկապես նրանց, ովքեր ընտրություններին ակտիվություն են ցուցաբերել եւ աջակցել իրենց կուսակցական թեւին՝ «Պատիվ ունեմ» դաշինքին: Համայնքների ղեկավարներին ասել է՝ «լավով» դիմում գրեք, հեռացեք: Համայնքապետերի պատասխանը եղել է. «Մենք ընտրված մարդիկ ենք, դիմումով չենք եկել, որ դիմումով էլ հեռանանք»:

Բոլորը բացասական պատասխան են տվել մարզպետին: Վերջինս ասել է, որ, միեւնույն է՝ շուտով նրանց պաշտոնավարման ժամկետը լրանալու է, այլեւս ընտրություն չի լինելու, նշանակովի է լինելու, եւ իրենք այլեւս չեն նշանակվելու: Թե այդ երբ եւ ինչպես է փոխվել ՏԻՄ օրենքը, հայտնի է միայն, հավանաբար, Թեւոնյանին, որն իրեն կարծում է նախկին «ռայկոմի քարտուղար», գյուղապետերին էլ՝ «գյուղսովետի նախագահներ»: Տեսնելով, որ համայնքապետերը չեն համաձայնում իրենց դիմումի համաձայն հեռանալ, Թեւոնյանը զգուշացրել է՝ դե, դուք գիտեք, էսա Երեւանից Վերահսկողական ծառայությունից ստուգողներ կգան, ու ոնց էլ լինի՝ ամենքիդ վրա մի բան կգտնեն: Համայնքապետերը, սակայն, որոշել են չհանձնվել:  

Ռազմիկ Թեւոնյանը Նիկոլ Փաշինյանի հանրահավաքների ժամանակ մարզի գյուղացիներին Երեւան բերելու համար գայթակղում էր, թե՝ ճանապարհին պատիվ կտամ, ուտել-խմելով կգնաք: Մարդիկ էլ, գործից հետո քյաբաբ ուտելով, զրուցելով գալիս էին հրապարակ: Մի խոստում էլ էր տալիս Թեւոնյանը գյուղացիներին, թե խանութներում ունեցած նրանց «նիսյաներն» ինքը կփակի: Բնակիչները, սակայն, սրան քիչ են հավատում: Ավտոբուսում անգամ կատակել են՝ փակող է, թող իրա գործարանի խաղողի նիսյաները փակի, որից արդեն գյուղացիները ձեռք են քաշել:

Հիշեցնենք, որ Թեւոնյանը սեփականաշնորհման տարիներին բավականին էժան գնով ձեռք էր բերել Երասխի գինու գործարանը, քանի որ ՀՀՇ-ի իշխանության տարիներին նրա թուրն աջ ու ձախ կտրում էր: Արարատի մարզի գյուղացիներից շատերը խաղող են մշակում, եւ ժամանակին այն մթերում էր նաեւ Ռազմիկ Թեւոնյանի գործարանը, բայց գյուղացիների փողերը չէր տալիս: Մեր աղբյուրն ասում է, որ իր դուռը գնացած գյուղացիներին Թեւոնյանը դիմավորում էր զենքով ու ասում՝ գնացեք, «արաղով քիչ-քիչ կփակվեմ», եւ յուրաքանչյուրի ձեռքն իր գործարանի արտադրության մի քանի շիշ օղի էր տալիս ու ճանապարհում: