Երևանի ընդհանուր իրավասության դատարիանի դատավոր Սարգիս Երցյանը, որը Սերգո Երիցյանի որդին է, պարտավորեցրել է առողջապահության նախարար Արսեն Թորոսյանին ներողություն խնդրել Սերժ Սարգսյանի խնամի Արա Մինասյանից: Վերջինս, հիշեցնենք, գտնվում է հետախուզման մեջ:
Դատարանի որոշմամբ, բացի հրապարակային ներողություն խնդրելուց առողջապահության նախարարությունից հօգուտ Արա Մինասյանի պետք է բռնագանձվի 12.000 ՀՀ դրամ, որպես նախապես վճարված պետական տուրքի գումար: Ավել վճարված պետական տուրքի 40.000 ՀՀ դրամը վերադարձնել Արա Միքայելի Մինասյանին:
«Հրապարակի»-ի հետ զրույցում Արսեն Թորոսյանի պաշտպան Գևորգ Գյոզալյանը հայտնեց, որ դատարանի որոշմանը վերաբերում են բացասական և անպայման բողոքարկելու են այն․ «Երևի թե մամուլի ասուլիս էլ կհրավիրենք, որովհետև խախտումներն այնքան ակնհայտ են, որ հրապարակային պետք է դրան անդրադառնանք: Վճիռը չի հատում օբյեկտիվության սահմանը, ինձ մոտ տպավորություն է, որ հայցադիմումն ամբողջությամբ արտագրվել է և կնիքվել»:
Արա Մինասյանը, հիշեցնենք, «Սուրբ Գրիգոր Լուսավորիչ» բժշկական կենտրում կատարված չարաշահումների առթիվ հարուցված քրեական գործով ունի մեղադրյալի կարգավիճակ: Նա հետախուզվում է: Արա Մինասյանը զրպարտության և վիրավորանքի համար քաղհայցով դիմել է դատարան
