Իսրայելն ու Իրանը շարունակում են օդային պատերազմը՝ խոցելով միմյանց կարևորագույն ռազմավարական, միջուկային օբյեկտները:
«Հրապարակը» կապ հաստատեց Իսրայելում բնակվող իսրայելցի քաղաքական վերլուծաբան, քաղաքական ակտիվիստ Յարոն Վեյսի հետ, հասկանալու համար, թե ինչ իրավիճակ է Իսրայելում:
-Ի՞նչ է կատարվում հիմա ձեզ մոտ: Ի՞նչ են մտածում մարդիկ Նեթանյահուի և այս պատերազմի մասին:
-Իսրայելում իրավիճակը շատ լարված է։ Մարդկանց կոչ են արել մնալ ապաստարաններում, դրսում գրեթե ոչ ոք չկա։ Շատերը սնունդ են կուտակում։ Ինչ վերաբերում է Նեթանյահուին, ապա Իսրայելում նրա վերաբերյալ կոնսենսուս չկա։ Բնակչության առնվազն կեսը կարծում է, որ նա կոռումպացված է և պատասխանատու է հոկտեմբերի 7-ի կոտորածին հանգեցրած անփութության համար։
-Ճի՞շտ էր արդյոք Նեթանյահուի կողմից Իրանի վրա հարձակումն անելը:
-Պատմությունը կդատի։ Իսրայելի և ամբողջ աշխարհի փորձագետները պնդում են, որ Իրանը մեկ քայլ էր հեռու միջուկային ռումբ ունենալուց։ Հետևաբար, նրանց կարծիքով, դա կանխելու միակ միջոցը ռազմական հարձակումն է, քանի որ Իրանը չի համաձայնի հրաժարվել ուրանի հարստացումից բանակցությունների շրջանակներում։
-Իսկ ի՞նչ կասեք միջուկային օբյեկտներին հարվածելու մասով:
-Անձամբ ես բավարար տեղեկատվություն չունեմ։ Ես հիմնվում եմ լրատվամիջոցներում հրապարակված հետախուզական ծառայությունների գնահատականների վրա։ Անձամբ ես կարծում եմ, որ յուրաքանչյուր ռազմական գործողություն պատճառ է դիվանագիտական ձախողման։ Տարիների ընթացքում Իսրայելն ու Իրանը անթիվ հնարավորություններ են ունեցել կանխելու լարվածության սրումը։ Ի վերջո, երկու երկրների ձախողված պետական գործիչները չկարողացան կանխել այս ռազմական բախումը:
-Ո՞ւր կտանի իսրայելը Իրանի դեմ պատերազմը:
-Դեռ վաղ է ասել, սակայն այս պատերազմը շատ վտանգավոր է, քանի որ այն կարող է նոր պատերազմներ հրահրել ամբողջ տարածաշրջանում և նույնիսկ դրանից դուրս։ Օրինակ՝ Կովկասում հավասարակշռությունը խախտելով՝ կա այլ կողմերի, ինչպիսիք են Թուրքիան, Պակիստանը և Իրաքը, ներգրավման վտանգ։ Հնարավոր են նաև մարտեր Լիբանանում։ Կա էներգետիկ ճգնաժամի հավանականություն, եթե Իրանը հարձակվի Պարսից ծոցի երկրների վրա կամ նույնիսկ փակի Հորմուզի նեղուցը։ Կա նաև վտանգ, որ Իրանը կհարձակվի ԱՄՆ զինված ուժերի կամ նավատորմի թիրախների վրա, ինչը կստիպի ԱՄՆ-ին արձագանքել և դրանով իսկ լրացուցիչ խաղացողներ ներքաշել մարտերի մեջ։
-Ի՞նչ եք կարծում, ինչո՞ւ Նեթնայահուն որոշեց սկսել այս պատերազմը:
-Այն մտավախությունը, որ Իրանը մշակում է միջուկային ռումբ, բնորոշ է բոլոր իսրայելցիներին։ Հետևաբար, այս հարձակումը միայն ժամանակի հարց էր։ Նեթանյահուի համար հարձակման ժամանակը շատ հարմար էր կոալիցիոն ճգնաժամի պայմաններում, երբ նրա կառավարությունը գտնվում էր լուծարման եզրին, նրա նկատմամբ շարունակվում էր քրեական դատավարությունը, իսրայելական հանրության դժգոհությունը Գազայում պաղեստինցիների դեմ շարունակական հարձակումներից և առևանգվածներին չվերադարձնելուց։
