Առողջապահության նախարար Անահիտ Ավանեսյանն այսօր կառավարության նիստից հետո լրագրողների հետ զրույցում ասաց, որ սեպտեմբերի 13-14-ին ադրբեջանական հարձակման հետևանքով զոհված զինծառայողների մարմինների նույնականացման գործընթացն ավարտվել է, և չնուjնականացված մարմին չունենք: Նա հայտնեց, որ 201 նույնականացված մարմին կա:
Hraparak.am-ի հարցին` 44-օրյա պատերազմից հետո կա՞ն մարմիններ, որոնք դեռևս չեն նույնականացվել, նախարարն ասաց. «Մենք երկու անգամ չնույնականացված դիերի հետ կապված փորձաքննություններ իրականացրինք նաև Հոլանդիայում, առաջին և երկրորդ փորձաքննությունների պատասխաններն արդեն իսկ ստացել ենք, բայց դեռ ունենք մասունքներ, որոնք, ցավոք սրտի, էնտեղ էլ հնարավոր չի եղել նույնականացնել»:
Հարցին` կա՞ն ծնողներ, որոնք չեն համաձայնել փորձաքննության արդյունքներին, Ավանեսյանն ասաց. «Իհարկե, եղել են, 60-ից ավելի մեր իրականացրած փորձաքննությունները նաև տարվել են այլ երկրներում կրկնակի, եռակի փորձաքննությունների, և դրանք բոլորը նույնական պատասխան եմ ստացել: Բայց, այո, ցավոք սրտի, դեռ ունենք չհուղարկավորված դիակներ»:
Հետաքրքրվեցինք նաև, թե կա՞ն, արդյոք, այնպիսի ծնողներ, որոնք ինչ-ինչ պատճառներով դիտավորյալ չեն ցանկանում ընդունել փորձաքննության արդյունքներն ու հուղարկավորել իրենց զավակներին: Անահիտ Ավանեսյանը, սակայն, չցանկացավ այս հարցին պատասխանել, ինչից ենթադրելի է, որ կան այդպիսի ծնողներ:
