Արեւելքի հարուստ պատմությունը, հին քաղաքակրթությունները, անսովոր ավանդությունները, փիլիսոփայական ուսմունքները դարեր շարունակ ներշնչել են թե՛ նկարիչներին, թե՛ գրողներին եւ թե՛ ռեժիսորներին։ Ու պատահական չէ, որ կինոարվեստում էլ Արեւելքը ներկայացվել է որպես խորհրդավորության, ոգեկան խորության եւ զարմանահրաշ գեղեցկության սիմվոլ։ Շատ ֆիլմեր պատմում են Արեւելքի ժողովուրդների, նրանց պատմության, մշակույթի մասին, օգնում են ավելի լավ հասկանալ Արեւելքի նրբությունները: Արեւելքի մասին կինոարվեստում առաջինը արաբական հեքիաթների հիման վրա նկարահանված կինոնկարներն են: Հիասքանչ պալատներ, անապատներ, քարավաններ, արեւելյան շուկաներ, լեգենդար հերոսներ․․․ այս ամենը կինոմեկնաբանության մեջ դառնում է կախարդանք եւ գրավում է կինոդիտողներին։ Հատկապես Ալադինի կերպարը, որը բազմաթիվ կինո եւ անիմացիոն մեկնաբանություններով է ներկայացվում։
Արաբական աշխարհից բացի, Արեւելքը համաշխարհային կինոյում հատկապես ներկայացված է Ճապոնիայով։ Լեգենդար ռեժիսոր Ակիրա Կուրոսավայի աշխատանքներն ահռելի ազդեցություն են թողել ողջ համաշխարհային կինոյի վրա։ «Յոթ սամուրայները», «Արյան մեջ թաթախված գահը» եւ այլ ֆիլմեր բացահայտել են ճապոնական մշակույթը, սամուրայական պատվի կոդեքսը, ավանդական պատկերացումները պարտքի, հավատարմության եւ արդարության մասին։ «Յոթ սամուրայները» առհասարակ կինոարվեստի մեծագույն գործերից է, որը ներշնչանքի աղբյուր է դարձել շատ ռեժիսորների համար։ Արեւելյան գեղագիտությունը հատկապես առկա է Չժան Իմոուի «Թռչող դաշույնների տունը», «Հերոսը» կինոնկարներում։ Սրանք գրավում են ոչ միայն իրենց սյուժեներով, այլ նաեւ՝ վիզուալ գեղեցկությամբ։ Յուրաքանչյուր կադր հիացնում է, ավանդական կոստյումներն ու ճարտարապետությունը, բնական լանդշաֆտը ընդգծում են չինական մշակույթի հարստությունը։ Մարտական արվեստներն այստեղ ներկայացված են ոչ միայն որպես մարտ մղելու ձեւեր, այլեւ որպես փիլիսոփայություն եւ հոգեւոր հիմք։ Իհարկե, պետք է խոսենք նաեւ հնդկական կինոարվեստի եւ Բոլիվուդի մասին, որը կինոյում յուրահատուկ երեւույթ է։ Երաժշտություն, պարեր, երգեր, սոցիալական թեմաների արծարծում, չարի եւ բարու պայքար, բարու հաղթանակ։ Ի լրումն դրա՝ ավանդական կոստյումներ, միջավայր, երաժշտութուն։
