ՀՀ Սահմանադրական դատարանը ուրբաթ երեկոյան հրապարակել է սահմանազատման հետ կապված կանոնակարգի մասին որոշումը: Խոսքը Հայաստանի եւ Ադրբեջանի միջև պետական սահմանի սահմանազատման և սահմանային անվտանգության հարցերով հանձնաժողովների համատեղ գործունեության մասին կանոնակարգի սահմանադրականության վերաբերյալ որոշման ամբողջական տեքստի մասին է։
ՔՊ-ական իշխանության սրտի ՍԴ-ն որոշման մեջ գրել է, որ Անկախության հռչակագրում նշված որոշ դրույթներ, «որոնք լայն համատեքստում կարող են որպես նպատակներ պարունակող դրույթներ դիտարկվել, չեն ամրագրվել Սահմանադրության և դրա հետագա փոփոխությունների մեջ» ու ըստ այդմ, եզրահանգում է, որ «այլևս վերացնում է Հռչակագրի նախաբանում ամրագրված «հիմնվելով 1989 թվականի դեկտեմբերի 1-ի «Հայկական ԽՍՀ-ի և Լեռնային Ղարաբաղի վերամիավորման մասին» Հայկական ԽՍՀ ԳԽ-ի և ԼՂ Ազգային խորհրդի համատեղ որոշման վրա» դրույթի վերաբերյալ՝ սույն որոշման 2-րդ կետում նշված հարցի լուծման համար հետագա քննության անհրաժեշտությունը»։
«Հրապարակ»-ին սահմանադրագետ Վարդան Պողոսյանն ասաց, որ այս տեքստը խայտառակություն է եւ իրավական լեզվից թարգմանաբար նշանակում է, որ ՀՀ իշխանություններն Ալիեւին ուղերձ են հղում առ այն, որ Հայաստանի ՍԴ-ն ասում է՝ Անկախության հռչակագիրը խոչընդոտ չէ խաղաղության պայմանագրի համար, որովհետեւ Արցախի «պատկանելությունը Ադրբեջանին համապատասխանում է ՀՀ Սահմանադրությանը»։
Վարդան Պողոսյանի հետ զրույցի մանրամասները կարդացեք «Հրապարակ»-ի առաջիկա համարում։
Նշենք, որ ՍԴ դատավորներից երեքը հատուկ կարծիք ունեն։ ՍԴ նախկին նախագահ, այժմ դատավոր Հրայր Թովմասյանը ամբողջովին դեմ է եղել հրապարակված կարծիքին եւ իր հատուկ կարծիքը կհրապարակի առաջիկայում, իսկ մյուս երկու դատավորները՝ Վահե Գրիգորյան ու Դավիթ Խաչատուրյանը կողմ են որոշմանը, բայց հիմնավորումների մասով այլ կարծիք ունեն։
