Stratfor պարբերականը, որին նաեւ անվանում են «ստվերային կենտրոնական հետախուզական վարչություն», կարծում է, որ հայ-թուրքական հարաբերությունների ջերմացումը կարող է ուժեղացնել Թուրքիայի ազդեցությունը ռեգիոնում, նաեւ՝ մասնակիորեն նվազեցնել Հայաստանի կախվածությունը Ռուսաստանից։ Սակայն այդ պրոցեսը Ռուսաստանը թույլ չի տալու, որ շատ զարգանա։ Պարբերականի վերլուծաբանները նշում են, որ վերջին տարիներին Հայաստանն ու Թուրքիան ձեռնարկել են փորձեր՝ երկարատեւ լարվածությունից հետո նորմալացնելու հարաբերությունները։ Հատկապես դա նկատելի դարձավ Ադրբեջանի կողմից ԼՂ-ում լիակատար կերպով իր վերահսկողության հաստատումից հետո։ Միաժամանակ, Երեւանը ձգտում է նվազեցնել իր կախվածությունը Ռուսաստանից՝ զարգացնելով քաղաքական, տնտեսական եւ ռազմական կապեր Արեւմուտքի հետ։
Stratfor-ում կարծում են, որ Հայաստանի եւ Թուրքիայի հարաբերությունների սերտացումը կարող է ուժեղացնել Թուրքիայի դիրքերը՝ որպես ռեգիոնալ «միջին կարգի խաղացողի», որը կապում է Եվրոպան, Կովկասն ու Մերձավոր Արեւելքը, ինչպես նաեւ՝ մասնակիորեն թուլացնել Իրանի ռեգիոնալ ազդեցությունը։ Հայաստանի համար դա, ըստ վերլուծաբանների, կարող է նշանակել առեւտրային ուղիների ընդլայնում եւ հասանելիության ձեռքբերում արեւմտյան շուկաների հանդեպ, ինչպես նաեւ՝ արտաքին տնտեսական կապերի վերաձեւակերպում։ Միաժամանակ, հոդվածում ասվում է, որ Ռուսաստանի հետ հարաբերությունները երկու երկրների համար էլ մնում են առանցքային կարեւորության եւ սահմանափակում են հարաբերությունների հնարավոր սերտացումը։ Մոսկվան, ինչպես ենթադրվում է, կարող է կիրառել տնտեսական լծակներ, եթե զգա, որ Հայաստանի՝ Թուրքիայի եւ Արեւմուտքի հետ հարաբերությունները չափազանց խորացել են։ Սահմանի բացումն էլ կարող է կախված լինել ներքաղաքական այն իրավիճակից, որը Հայաստանում կտիրի ընտրություններից հետո՝ ասված է հոդվածում։
