Էս ժողովուրդն առաջնորդ չի սիրում, սիրում է իրեն խաբող, գցող սրիկա կենդանու․ ԵԿՄ նախկին փոխնախագահ

Երկրապահ կամավորականների միության նախագահ, ՔՊ-ական Սասուն Միքայելյանը երեկ հայտարարել է, թե մենք հնարավորություն չունենք Ադրբեջանի դեմ պայքարելու, ուստի պետք է գնանք սահմանազատման։ Այս թեմայի շուրջ զրուցել ենք ՀՀ ԵԿՄ վարչության նախագահի նախկին տեղակալի հետ, ում խնդրանքով չենք հրապարակում անունը։

-Որքանո՞վ  է ՀՀ ԵԿՄ նախագահի այդ հայտարարությունը բխում Հայաստանի շահերից։ 

-Ես չեմ ուզում ոչ լսել, ոչ էլ մեկնաբանել նրանց արած որեւէ արտահայտություն։ Մեր երկիրը արհեստականորեն տարվում է կործանման։ Ես արդեն պաշտոնաթող եմ, հեռու եմ բանակից ու ԵԿՄ-ից։ Ազգակործանների մասին ոչ ուզում եմ լսել, ոչ էլ պատասխանել։ 

-Մտադիր չե՞ք վերադառնալ զինված ուժեր։ 

-Ոչ, ես այս թուրքական ղեկավարության հետ չունեմ ծառայելու։ Բանակը դարձել է երկրի իշխանության գործիքը։ Ես չունեմ թուրքերին ծառայելու։

-Մտահոգվա՞ծ չեք Հայաստանի ճակատագրով։ 

-Ես արդեն ինֆարկտ եմ ստանում, ամեն օր սպասում եմ, թե երբ պիտի ինֆարկտը տա, պրծնեմ էս երկրից։

-Կարծում եք կրկին պատերա՞զմ կլինի։

-Ինչի` պատերազմն ավարտվե՞լ է։ Այս երկիրն ամեն վայրկյան պատերազմի մեջ է, մի օր բորբոքվում է, մի օր թույլ է։ 

-Իշխանությունը վստահ է, որ 2026-ի ընտրություններին վերընտրվելու է, ի՞նչ իրավիճակ կլինի։

-Մենք չունենք հայկական իշխանություն, սա թուրքական իշխանություն է։

-Ասում են` նոյեմբերին հնարավոր է իրավիճակը լարվի, ուստի նոր զիջումներ են սպասվում։

-Օպերայում տեսե՞լ եք, թե ինչ են արել՝ կոտրված դռներ, լուսամուտներ, իբրեւ ցուցահանդես է։ Դա ավերված Երեւանի մակետն էր, ռմբակոծված Երեւանի մակետը։

-Իսկ ժողովուրդն ի՞նչ պետք է անի։

-Գլուխը պատին տա, պատն էլ գլխին։ Ինչ արել են, այդ էլ ստանում են։

-Իսկ Դուք այլ առաջնորդ տեսնում ե՞ք, որի հետեւից ժողովուրդը կգնա, եւ երկիրը կհանի այս իրավիճակից։ 

-Իսկ այս ժողովուրդն առաջնորդի հետեւից գնացող ժողովո՞ւրդ է։ Երբ առաջնորդի հետեւից գնացող կլինի, առաջնորդ կգտնեն։ Էս ժողովուրդն առաջնորդ չի սիրում, սիրում է իրեն խաբող, գցող սրիկա կենդանու։