Մեզ միշտ, բոլոր իշխանությունների օրոք թվացել է, թե տվյալ ժամանակվա իշխանությունից ավելի վատը չկա, ու չի էլ կարող լինել, բայց միշտ Այգեկցու առակի նման հայտնվել է մեկը, ով իր գործողություններով, մոտեցումներով, երկիր կառավարելու, ավելի ճիշտ՝ կործանելու մոդելով ապացուցել է, որ այնուամենայնիվ կա վատից ավելի վատը, վատագույնից առավել վատագույնը: Նիկոլ Փաշինյանը Հայաստանի Նորանկախ պատմության շրջանի վատագույն ղեկավարն է և դա քննարկման ենթակա չէ:
Մարդուն մշտապես պետք է գնահատել իր գործողություններով և դրանց հետևանքներով, և միայն 44-օրյա պատերազմն ու Արցախի հանձնումը բավարար են պնդելու համար, որ մինչ այս պահը Փաշինյանը որպես վատ ղեկավար անգերազանցելի է եղել: Չնայած այս ամենին՝ ես դեռ այն կարծիքին եմ, որ Փաշինյանից ավելի վատ տարբերակներ էլ կան, և երկու օրինակ եմ ուզում բերել, որ եթե մի օր հանկարծ այդ երկու տարբերակներից մեկը գա իշխանության, Նիկոլին գուցե երանի կտանք, ինչպես հիմա երանի ենք տալիս նրա նախորդներին: Մի տարբերակը Աննա Հակոբյանն է: Նրանից ավելի նենգ, չար, Հայաստանն ու Արցախը ատող, հիշաչար ու անկանխատեսելի հավակնորդ չկա դաշտում: Եթե մի չարաբաստիկ օր հանկարծ Աննա Հակոբյանը ինչ-որ հրաշքով դառնա վարչապետ, իսկ նրա այդ հավակնությունների մասին շատ է գրվել, այդ ժամանակ իսկապես Հայաստան գոյություն չի ունենա:
Մյուս վատագույն տարբերակը՝ հայտնի սորոսական շրջանակներից կազմված կեղծ արևմտամետների Եվրադաշինքն է՝ արամսարգսյանների և արմանբաբաջանյանների գլխավորությամբ: Մենք հակված ենք կարծելու, որ Նիկոլ Փաշինյանից ավելի ագրեսիվ ու հետևողականորեն որևէ մեկը չի կարող քանդել երկիրը, սակայն խելապակասների, անադեկվատների, ռուսաֆոբների և դեմագոգների այս դաշինքը հաշված ժամերի ընթացքում կարող է պայթեցնել Հայաստանը: Ես ամենևին չեմ ուզում ասել, որ Նիկոլ Փաշինյանը պետք է մնա իշխանության, քանի որ կա նրանից ավելի վատ երկու տարբերակ: Նիկոլը պետք է հեռանա, դրանում ոչ մի խոսք: Սակայն եթե նրանից ավելի վատ այս երկու տարբերակները ակտիվանան, բավարար ձայներ հավաքեն, դա Հայաստանի վերջը կլինի….
