Այսօր Սուրբ Աթոռում ՀՀ նախկին դեսպան Միքայել Մինասյանը տելեգրամի իր ալիքում գրել էր, որ Մոսկվայում ԱԱԾ տնօրենն իր ադրբեջանցի գործընկերոջ հետ հանդիպումից և ադրբեջանական կողմի հետ՝ նիկոլական իշխանության մի շարք այլ կասկածելի շփումներից հետո, հունվարի 11-ին նախապատրաստվող Փաշինյան-Ալիև հանդիպումից առաջ, Արմեն Աբազյանին, խիստ գաղտնիության մթնոլորտում, ուղարկում են Բաքու: «Նրա առջև խնդիր է դրված՝ ձևակերպել և գրավոր արձանագրել բոլոր այն խայտառակ զիջումներն ու կորուստները, որոնք արդեն արվել են բանավոր պայմանավորվածությունների հիման վրա, ինչպես նաև պարտավորություններ ստանձնել հաջորդների վերաբերյալ»,-գրել էր Մինասյանը:
Լուրը առավոտից շրջանառվում է համացանցում, իսկ ԱԱԾ-ից որևէ արձագանք չկա: Մենք կապ հաստատեցինք ԱԱԾ մամուլի պատասխանատու Արթուր Գևորգյանի հետ, որ նրանից որևէ մեկնաբանություն ստանանք այս թեմայով, սակայն նա մեզ խորհուրդ տվեղ կապ հաստատել ԱԱԾ մամուլի կենտրոնի հետ: Զանգեցինք նաև ԱԱԾ կայքում նշված մամուլի կենտրոնի հեռախոսահամարով, որը մեզ առաջարկում էր Արթուր Գևորգյանը: Սակայն մեր զանգերին պատասխանող չեղավ: Ի վերջո, քանի որ ԱԱԾ մամուլի պատասխանատուներից հնարավոր չեղավ որևէ մեկնաբանություն ստանալ, ստիպված զանգահարեցինք ԱԱԾ տնօրեն Արմեն Աբազյանի հետ: Վերջինս, ի զարմանս մեզ, պատասխանեց զանգին և տվեց մեկնանաբություն` արդյոք ճի՞շտ են լուրերը, որ ինքը մեկնելու է Բաքու:
-Պարոն Աբազյան, առավոտից լուրեր են շրջում, որ Դուք մեկնելու եք Բաքու: ԱԱԾ-ից չեն մեկնաբանում, Դուք ի՞նչ կարող եք ասել:
-Ոչ, ոչ, նման բան չկա:
-Այսինքն` Բաքու չե՞ք մեկնելու:
-Ոչ, ոչ:
-Դուք Մոսկվա էլ էիք մեկնել, այնտեղ ի՞նչ արդյունք տվեցին Ձեր հանդիպումները:
-Հա, Մոսկվա համատեղ եռակողմ հանդիպում ենք ունեցել, որի հետ կապված հետագա համագործակցություն պետք է լինի: Բայց որևԷ կոնկրետ պայմանավորվածություն չունենք:
-Այսինքն` միանշանակ հերքում եք, որ Բաքվում Ձեր պաշտոնակցի հետ հանդիպում չե՞ք ունենալու:
-Միանշանակ:
Այլ հարցերի պարոն Աբազյանը չպատասխանեց:
Հ.Գ. Նկատենք, որ երեկ երեկոյան ժամը 9-ի կողմերը Երևան-Սևան մայրուղում Երևանից դուրս ուղղությամբ ընթանալիս նկատեցինք ԱԱԾ տնօրենին սպասարկող ավտոմեքենաները. առկայծող փարոսիկները միացրած` մեծ արագությամբ սլացան մեր կողքով: Թե ուր էր մեկնում ԱԱԾ տնօրենը, կարելի է միայն կռահել: Հավանաբար Ծաղկաձոր, որտեղ այդ պահին գտնվում էր Նիկոլ Փաշինյանը. ականատեսները երեկ երեկոյան լուսանկար էին տեղադրել Ծաղկաձորի «Յասաման» ռեստորանի մոտից՝ հայտնելով, որ Նիկոլ Փաշինյանը գտնվում է այդտեղ, իսկ նրա անվտանգության աշխատակիցները փակել էին ամբողջ փողոցը:
