2025թ․ սեպտեմբերին Զորական և Կոթի գյուղերի մի խումբ անչափահասների կողմից Նոյեմբերյան քաղաքում խմբակային ծեծի էր ենթարկվել Նոյեմբերյանի պետական քոլեջի 17-ամյա ուսանող Ալեն Ջանվելյանը։ Այդ մասին համացանցում տեսանյութ էր հրապարակվել, որը մեծ արձագանք է գտել հանրության մեջ: Ներկայումս Տավուշի մարզի առաջին ատյանի դատարանում ընթանում է այդ քրեական գործով դատավարությունը, մեղադրյալները 5-ն են՝ Տիգրան Ուռուտյանը, Մխիթար Բաբաջանյանը, Հայկ Աղաջանյանը, Լևոն Սարուխանյանը և Հակոբ Գասպարյանը: «Դատալեքս» դատական տեղեկատվական համակարգում այդ դատավարության վերաբերյալ ինֆորմացիան սահմանափակված է : Զանգահարեցի Տավուշի մարզի առաջին ատյանի դատարանի Իջևանի նստավայր: Տավուշի առաջին ատյանի ընդհանուր իրավասության դատարանի աշխատակազմի ղեկավար Արման Ժամհարյանը այդ դատավարության վերաբերյալ «Դատալեքսում» տեղեկատվության սահմանափակման , դատավարության վերաբերյալ հայտնեց՝ ընդունված կարգ է , որ գործերը քննող դատավորների որոշումներով անչափահասների մասնակցությամբ քրեական տարբեր գործերով դատավարությունները դռնփակ են կայանում, դա անչափահասների շահերի օգտին է արվում: Այդ դատավարություններին կարող են մասնակցել միայն դատավարության կողմերը:
