Ցանկացած ըմպելիք այդ թվում և սուրճ օգտագործելիս, մեծ է հավանականությունը, որ այն կարող է թափվել սփռոցի, գորգի կամ հագուստի վրա: Մի անզգույշ շարժում, և դուք անհարմար իրավիճակում եք:
Սուրճի հետքերը դժվար հեռացվող բծերի շարքից են: Գործվածքի վրա սուրճը թողնում է դեղնաշագանակագույն հետք և շատ արագ ներծծվում է: Գոյություն ունեն սուրճի հետքերը վերացնելու մի քանի միջոցներ, որոնցից մեկ-երկուսը ներկայացնում ենք ստորև:
Սուրճի թարմ հետքը պետք է մշակել կերակրի աղով, կամ գլիցերինի և աղի խառնուրդով այնուհետև գործվածքը լվանալ տաք ջրով:
Տարբեր տեսակի գործվացքներից սուրճը կարելի է հեռացնել նաև անուշադրի սպիրտի, գլիցերինի և ջրի հավասար հարաբերակցությամբ խառնուրդի միջոցով: Անհրաժեշտ է այն լցնել հետքի վրա, թողնել մի ամբողջ օր, ապա լվանալ:
Սինթետիկ գործվածքներից սուրճը հեշտությամբ կհեռացվի եթե մեկ ճաշի գդալ սպիրտին ավելացնեք կես լիտր ջուր, դրանով մշակեք հետքը այնուհետև լվանաք սառը ջրով:
Սպիտակ հագուստից սուրճի հետքերը կօգնի հեռացնել քլորի լուծույթը:
Բարի լույս սիրելի ընթերցողներ, վայելեք առավոտյան սուրճը և թող այն միայն հաճելի պահեր պարգևի ձեզ: «Հրապարակը» հաջող օր է մաղթում բոլորիդ:
