2024 թվականին Իրանում մահապատժի է ենթարկվել առնվազն 901 մարդ։ Դեկտեմբերի մեկ շաբաթվա ընթացքում սպանվել է 40 բանտարկյալ։
BBC-ի փոխանցմամբ՝ այս մասին հայտարարել է ՄԱԿ-ի մարդու իրավունքների հարցով գերագույն հանձնակատար Ֆոլքեր Թյուրքը։
Սա երկրում մահապատիժների ամենաբարձր թիվն է վերջին ինը տարվա ընթացքում: Մահապատժի մեծ մասը եղել է թմրանյութերի օգտագործման և թրաֆիքինգի հետ կապված հանցագործությունների համար, սակայն մահապատժի ենթարկվածները ներառում են այլախոհներ և մարդիկ, ովքեր ներգրավված են եղել 2022 թվականի բողոքի ցույցերին, նշել են ՄԱԿ-ում:
Բացի այդ, աճել է նաև մահապատժի ենթարկված կանանց թիվը։
Ինչպես լրագրողներին հայտնել է ՄԱԿ-ի Մարդու իրավունքների հանձնաժողովի մամուլի քարտուղարը, Թյուրքի հրապարակած տվյալները ստացվել են մի քանի կազմակերպություններից, որոնք ՄԱԿ-ը համարում է հավաստի աղբյուրներ, այդ թվում՝ Իրանի իրավապաշտպանների տեղեկատվական գործակալությունը (HRANA), ինչպես նաև «Մարդու իրավունքները Իրանում» (IHR) եւ Hengaw իրավապաշտպան կազմակերպություններից:
