Ազատամարտիկ Սերոբ Գասպարյանի գործով նախաքննության ավարտն արդեն հայտարարվել է, գործը ուղարկում են դատարան, «Հրապարակին» տեղեկացրեց Սերոբ Գասպարյանի պաշտպան Էրիկ Ալեքսանյանը: «Սերոբ Գասպարյանը շարունակում է մնալ կալանքի տակ»,-ասաց պաշտպանը:
Գասպարյանի տրամադրվածությունը մարտական է՝ նշեց Ալեքսանյանը: Իրավական առումով գործը սնանկ է, որովհետև Սերոբ Գասպարյանի առնչությունն իրեն վերագրվող արարքին հիմնված է այնպիսի մարդկանց ցուցմունքների վրա, որոնք ոչ թե տեղեկատվություն են հայտնել, այլ ընդամենն իրենց ենթադրությունն են փոխանցել քննությանը, ասաց փաստաբանը:
«Չկա մի փաստական տվյալ, որ Սերոբ Գասպարյանը կազմակերպել է իշխանության զավթում կամ` Գոռլովկա մեկնելը պայմանավորված է եղել այդ նպատակով, այսինքն, հետագայում Հայաստան վերադառնալու և բռնի ուժով իշխանությունը զավթելու նպատակով: Ոչ մի նմանատիպ ապացույց չկա, ով էլ այնտեղ գտնվել է, ով էլ, ենթադրենք` Սերոբ Գասպարյանի միջամտությամբ, գնացել է Գոռլովկա, գնացել է պարզապես աշխատելու և նոր հմտություններ սովորելու և տիրապետելու, բայց չկա որևէ մեկ ապացույց, որ Սերոբ Գասպարյանը կազմակերպել է այդ մարդկանց այնտեղ գնալը՝ հետագայում, չգիտեմ, որպեսզի նախապատրաստվեն ու գան Հայաստանում իշխանություն զավթելու նպատակով: Ոչ մի նմանատիպ ապացույց չկա: Ով էլ ինչ ասում է, երեք-չորս հոգու մասին է խոսքը, ասում են` մեր ենթադրությամբ, մեր կարծիքով Գասպարյանն իմացել է, որ մենք այստեղ այդ նպատակի համար ենք գտնվում, բայց վստահ չենք, դա մեր կարծիքն է, մեր ենթադրությունն է: Այս ձևակերպման հիման վրա Գասպարյանը չորս ամսից ավելի գտնվում է կալանքի տակ»,-ասաց Ալեքսանյանը:
Ըստ պաշտպանի, ազատամարտիկն արդեն 4 ամիս ապօրինաբար զրկվել է ազատությունից:
