Լրագրող Սյուզի Բադոյանն ահազանգել էր, որ Մարտունու շրջանի Լիճք գյուղում ծեծի են ենթարկել հասարական գործիչ Նաիրի Հոխիկյանի եղբորը՝ Լևոն Հոխիկյանին:
«Հրապարակի» հետ զրույցում Նաիրի Հոխիկյանը նշեց, որ ինքը Երևանում է գտնվում, և քիչ առաջ է զանգ ստացել Մարտունուց․ զանգել ու ասել են՝ հասիր, եղբորդ վրա հարձակվել են, ծեծում են:
«Այս պահին հիվանդանոցում է, չգիտեմ, ավարտել են բուժօգնությունը, թե ոչ, բայց տասը րոպե առաջվա դրությամբ հանցագործներին բերման չէին ենթարկել: Հանցագործները ՔՊ-ի վստահված անձինք են՝ մեկը Լիճքի վարչական շրջանի ղեկավար Սիրական Սիրականյանն է, մյուսը` Մարտունու բժշկական կենտրոնի վիրաբույժը, նորից` Սիրական Սիրականյան, այս երկուսն են եղբորս վրա հարձակման կազմակերպիչներն ու նաև ակտիվ ՔՊ-ականներ են։ Մի քանի հոգով հարձակվել ու ծեծի են ենթարկել եղբորս»,-ասաց Հոխիկյանը:
Նա նշեց, որ իրեն հասած տեղեկությունների համաձայն, եղբոր վնասվածքները հիմնականում դեմքի շրջանում են, ինքն է դիմել ոստիկանություն, երբ Մարտունուց ստացել է զանգը, իսկ եղբայրը՝ Լևոն Հոխիկյանը «Ուժեղ Հայաստանի» վստահված անձն է:
«Նկատողություն է արել, անօրինություն են արել՝ մի քանի հոգով վստահված անձինք մտել են տեղամաս, խախտում են արել, եղբայրս ասել է՝ չի կարելի: Իրենք հայհոյելով դուրս են եկել, այդ պահին ոչինչ չեն արել: Հետո եղբայրս դուրս է եկել որոշ ժամանակից, խանութ է մտել, ոնց որ դարանակալած են եղել: Եղբայրս խանութից դուրս է եկել ու հարձակվել են եղբորս վրա»:
Մեր հարցին, իսկ ընտրատեղամասում գտնվող ոստիկանը չի՞ արձագանքել տեղի ունեցողին, Հոխիկյանն ասաց, որ ոչ, որևէ արձագանք գործողություն չի եղել:
Ի դեպ, «Հրապարակին» հասած տեղեկությունների համաձայն՝ Լիճքի վարչական շրջանի ղեկավար և Մարտունու ԲԿ -ի վիրաբույժ երկու Սիրական Սիրականյանների հովանավորն էլ Գնել Սանոսյանն է, ով հետաքրքիր զուգադիպությամբ ընդդիմադիր ուժի վստահված անձին ծեծի ենթարկելու ժամանակ հարևան գյուղում ընտրողներին է ուղղորդելիս եղել, ինչպես նշում են ականատեսներն ու հրապարակված տեսանյութերը:
