«Հիասքանչ տեսարաններ, աստղազարդ գիշեր և հյուրընկալ մարդիկ. ահա թե ինչը գրավեց դեսպան Թրեյսիին այս շաբաթ իր արձակուրդն անցկացնել Սյունիքի մարզում»,-այս մասին տեղեկացնում է USAID-ի ֆեյսբուքյան էջը։
Դեսպանը Սյունիքի լեռներում մասնակցել է քայլարշավի տեղացիների հետ, գիշերը խարույկի շուրջ խոսել Հայաստանի հարուստ պատմության և մշակույթի մասին:
«Սյունիքը հիանալի վայր է հուշեր հավաքելու և ընտանիքի ու ընկերների հետ արժեքավոր ժամանակ անցկացնելու համար։ Որքան շատ եք այցելում Սյունիք, այնքան ավելի շատ բան եք բացահայտում այս հրաշալի մարզի և տեղացիների մասին»,-նշված է հաղորդագրության մեջ։
Մի շարք օգտատերեր՝ ԱԺԲ առաջնորդներից Վարուժան Ավետիսյանը, Կարոն Եղնուկյանի որդին՝ Գոքոր Եղնուկյանը և այլք շնորհակալություն են հայտնել դեսպան Թրեյսիին։ «Շնորհակալություն ԱՄՆ եւ հարգելի տիկին դեսպան։
Ամեն ինչ հասկանալի է բոլորին, առաջին հերթին` մեր թշնամիներին։
Սյունիքը Հայաստանի ողնաշարն է եւ շուտով դառնալու է նաեւ հայ-ամերիկյան ռազմավարական դաշնակցության աշխարհաքաղաքական առանցքը»,-գրել է Վարուժան Ավետիսյանը։
