Սահմանադրական դատարանի շենքի դիմաց լրագրողների հետ զրույցում «Ուժեղ Հայաստան» կուսակցությունների դաշինքի ներկայացուցիչ, փաստաբան Արամ Վարդևանյանը հայտարարել է, որ Սահմանադրական դատարանը բախվում է անկախության, անաչառության և չեզոքության լուրջ խնդիրների։
Նրա խոսքով՝ հունիսի 7-ին կայացած Ազգային ժողովի ընտրությունների արդյունքները վիճարկող յոթ քաղաքական ուժերի դիմումների քննության շրջանակում ՍԴ-ն պարտավոր է գնահատական տալ ընտրական գործընթացում արձանագրված խախտումներին։ Վարդևանյանը պնդել է, որ ընտրությունների ընթացքում տեղի ունեցած խախտումները եղել են զանգվածային և կազմակերպված բնույթի, ինչն, ըստ նրա, ակնհայտ է եղել հանրության համար։
Անդրադառնալով ընտրությունների արդյունքներին՝ նա նշել է, որ «Քաղաքացիական պայմանագիր» կուսակցությունը չի կարող համարվել ընտրությունների հաղթող։ Փաստաբանի գնահատմամբ՝ եթե իշխանության ձևավորումը պայմանավորված է միայն ձայների բաշխման առանձնահատկություններով, ապա դա չի կարող դիտարկվել որպես իրական հաղթանակի ցուցանիշ։
Վարդևանյանը նաև ընդգծել է, որ ընտրական գործընթացում առանցքային դեր ունեցող երկու կառույցները՝ Կենտրոնական ընտրական հանձնաժողովն ու Սահմանադրական դատարանը, ունեն անկախության հետ կապված լուրջ խնդիրներ։
Նա հավելել է, որ ՍԴ առնվազն երկու դատավորի վերաբերյալ դաշինքն ունի վերապահումներ, որոնք նախատեսում են ներկայացնել դատական նիստի ընթացքում։
