Երուսաղեմահայ համայնքի, առաքելական եկեղեցու մի շարք հոգեւորականների եւ Երուսաղեմի Հայոց պատրիարք Նուրհան արքեպիսկոպոս Մանուկյանի միջեւ ծավալվող եւ համահայկական-համազգային մասշտաբներ ստացած «Կովերի պարտեզ» հողամասի օտարման թեման շարունակում է ծավալվել ու արդեն համաշխարհային առաջատար լրատվամիջոցների ուշադրության կենտրոնում է հայտնվել։ Մասնավորապես՝ հունիսի 24-ին CNN ամերիկյան հեռուստակայանը թեմային նվիրված ռեժորտաժ է հրապարակել։ Ռեպորտաժում նշվում է խնդրի մասին՝ պատմական անդրադարձ կատարելով Սուրբ երկրում հայերի ավելի քան 1600-ամյա ներկայությանը եւ հարակից այլ հարցերի։ Ամերիկյան առաջատար հեռուստաընկերության զրուցակիցը երուսաղեմահայ լուսանկարիչ Կարո Նալբանդյանն է, ով էլ ներկայացրել է խնդիրը։
«Կովերի պարտեզի» հետ կապված խնդրում նորությունը թերեւս այն է, որ հունիսին Հայաստանից եւ Միացյալ Նահանգներից իրավաբանների խումբ է մեկնել Երուսաղեմ՝ մեկշաբաթյա այցով, որի ընթացքում հանդիպումներ են ունեցել համայնքի ներկայացուցիչների հետ, որպեսզի հասկանան, թե ինչպես է հնարավոր պաշտպանել համայնականների իրավունքներն ու Սուրբ երկրում հայկական մշտական ներկայությունը։ Պատրիարք Նուրհան Մանուկյանը մեկնաբանություններ չի տվել եւ շարունակում է խուսափել մամուլի եւ հանրության հետ շփումներից։ Համայնքի ներկայացուցիչների ուշադրությունից չի վրիպել այն, որ հունիսի կեսերին պատրիարքարանում սարկավագների ձեռնադրություն է եղել, որին սովորաբար պատրիարքը ներկա պետք է լիներ, սակայն վերջինս նույնիսկ այդ ծիսակատարությանը ներկա չի եղել։
CNN-ի հետ զրուցել է պատրիարքարանի ներկայացուցիչներից Սեւան արքեպիսկոպոս Ղարիբյանը, ով հայտարարել է, որ «Կովերի պարտեզը», ճիշտ է՝ վարձակալության է տրամադրվել 99 տարով, սակայն հիմա աշխատում են գործարքի չեղարկման ուղղությամբ։ Թե որքանով կարելի է արժանահավատ համարել նրա խոսքերը, դժվար է ասել, եթե հաշվի առնենք, որ Նուրհան պատրիարքն էլ բազմաթիվ անգամներ այդ հողամասի ապագայի հետ կապված տարբեր տեսլականներ է հայտնել, որոնք, պարզվել է, կեղծիք են եւ հետապնդում են մի նպատակ՝ քողարկել անօրինական օտարման գործարքը, որն ուղիղ հարված է Երուսաղեմում հայկական ներկայությանը։
