Վերադարձել են «դիվիզիայով» ու աշխատողի քիթը կոտրել․ մանրամասներ՝ Գյումրիում ռուս զինծառայողների մասնակցությամբ միջադեպից

Վերադարձել են «դիվիզիայով» ու աշխատողի քիթը կոտրել․ մանրամասներ՝ Գյումրիում  ռուս զինծառայողների մասնակցությամբ միջադեպից

Կիրակի օրը Գյումրիում ռուսական ռազմաբազայի զինծառայողների մասնակցությամբ տեղի ունեցած միջադեպը դեռ քննարկվում է քաղաքում։ 

Ռուս զինծառայողների մասնակցությամբ միջադեպեր Գյումրիում պարբերաբար գրանցվում են, բայց այս անգամ աղմուկը մեծ էր։

Նշենք, որ 102-րդ ռազմաբազայի մոտակայքում գտնվող «Ռոսիա» սննդի սպասարկման կետ երեք հարբած զինծառայող է մտել եւ հաճախորդների ու վաճառողների նկատմամբ  անշնորհք պահվածք են ցուցաբերել։  

Բնակիչները պատմեցին, որ դեպքը տեղի է ունեցել ցերեկը, եւ մեծ թվով պարեկներ են եղել տարածքում, սակայն հարբած զինծառայողներին անգամ նրանց ներկայությունը չի սթափեցրել։ «Ռոսիա» մսամթերքի աշխատակիցներից էլ պատմեցին, որ զինծառայողներն արդեն իսկ վաճառակետ են մտել հարբած վիճակում, իրենց անշնորհք են պահել, հայհոյանքներ հնչեցրել, իսկ երբ բոլորին դուրս են  հրավիրել, 10 րոպե անց վերադարձել են կրկնակի խմբով։ Ուզածներն՝ ինչ էր, այդպես էլ չհասկացան․ երբ ոստիկանները հարբածության թեսթ են անցկացրել, 1500-ը գերազանցել է․ չափազանց հարբած էին, պատմում են, որ կրկին վերադարձել են «դիվիզիայով» ու սկսել ծեծկռտուքը, աշխատողներից մեկի քիթն են կոտրել, հաճախորդների վրա իրեր նետել։

Ի դեպ, Գյումրի բժշկական կենտրոնից հաստատեցին, որ քթի կոտրվածքով քաղաքացի են ընդունել, որը բուժօգնություն ստանալուց հետո դուրս է գրվել։

Նշենք, որ ըստ ոստիկանության՝ դեպքի հետ կապված 3 անձ ձերբակալվել է, նախաքննություն է ընթանում, սակայն ձերբակալվածները ռուս զինծառայողներ են, թե ոչ, չի նշվում։