Թող Մարությանի բացակայության հարցն իրենց չտանջի

«Հրապարակի» զրուցակիցը Երեւանի ավագանու «Ազգային առաջընթաց» խմբակցության ավագանու անդամ Իզաբելլա Աբգարյանն է:

- Երեկ տեղի ունեցավ Երեւանի ավագանու երկրորդ նիստը, որն ի ցույց դրեց, որ ավագանու նիստերը խաղաղ չեն ընթանալու, եւ խմբակցությունների միջեւ համագործակցություն չի ստացվելու: Օրինակ` «Հանրապետություն» խմբակցության ղեկավար Անի Խաչատրյանը բավականին ագրեսիվ կերպով անդրադարձավ Ձեր թիմին եւ Հայկ Մարությանին: Նրան անգամ կոչ արեց կողմնորոշվել` կանացի՞ շորերով հանդես գալ, թե՞ տղամարդու: Ըստ էության, նորից կենտրոնում Մարությանի մասնագիտությունն էր` նրա դերասան լինելու հանգամանքը, սակայն բովանդակային խոսք այդպես էլ չհնչեց: Ինչի՞ մասին էր ավագանու այս նիստը:

- Օրակարգը քաղաքական թիմի հայեցողական թիմի պաշտոնների ընտրությունն էր: Դրանով էր պայմանավորված, որ երեկվա ելույթները ոչ թե քաղաքային էին, այլ՝ քաղաքական: Մեզ համար տարօրինակ չէին Անի Խաչատրյանի անդրադարձն ու դրա ոճը, որովհետեւ վերջին հինգ տարիների ընթացքում մենք նրա կողմից լսել ենք նույն բանը, ցավալի է, որ մարդիկ քաղաքական բովանդակությամբ ելույթ չեն կարողանում գեներացնել եւ անվերջ նույն բանն են կրկնում ու անձերից այն կողմ չեն գնում, բայց հասկանում եմ, ամեն դեպքում, որ ոչ բոլորին է հասու իրապես քաղաքական բովանդակությամբ ելույթներ ունենալը: Այնպես որ, Խաչատրյանի ասածները մեզ համար նորություն չէին: Հասարակությունն արդեն հոգնել է նույն բաները լսելուց:

- Հայկ Մարությանի՝ քաղաքապետարանի ավագանու նիստին չմասնակցելու հանգամանքն ինչո՞ւ այդքան քննարկվեց հենց «Հանրապետություն» կուսակցության կողմից: Ի՞նչ կարող էր Մարությանի ներկայությունը տալ «Հանրապետությանը»:

- Բնականաբար, այդ կուսակցությանը ոչինչ տալ չէր կարող Մարությանի ներկայությունը: Առհասարակ, նրանց չպետք է հետաքրքրի, թե մեր խմբակցությունից ով է ներկա եւ ով է բացակա: Մենք ընդդիմություն ենք, իսկ նրանք` իշխանություն, ուստի մենք չէ, որ իրենց ինչ-որ բան հաշվետու ենք: Ով է ներկա, ով` բացակա, դա իրենց խնդիրը չէ: Օրենսդրություն գոյություն ունի: Հայկ Մարությանը եւս այդ օրենքներին է ենթարկվում, եւ եթե բացակայությունների թիվը գերազանցվի, նրան հեռացվելու հարցը կդրվի: Կարճ ասած` թող Մարությանի բացակայության հարցն իրենց չտանջի: Թող ամեն մարդ իր խմբակցության անդամների մասին մտածի:

- Իսկ Մարությանն ինչո՞ւ չի մասնակցում նիստերին: Տեղյա՞կ եք, հաջորդ նիստերի հետ կապված՝ ի՞նչ որոշում ունի: Գուցե չի՞ ցանկանում այս կազմի հետ աշխատել:

- Չեմ կարող ասել, որ չի ցանկանում աշխատել այս կազմի հետ: Նա աշխատում է խմբակցության հետ: Գիտե՞ք, նիստերին ներկա լինելն այդքան էական չէ, դա կախված է օրակարգից: Ավագանու անդամի աշխատանքը մեծամասամբ դահլիճից դուրս է լինում: Քաղաքացիների հետ աշխատանք, նախագծերի կազմում եւ այլն: Հայկ Մարությանն ակտիվ աշխատելու է որպես օրենսդիր: Նա երեւանցիների հարցերի լուծումներն առաջ տանող է: Թե երբ դահլիճ կգա, չեմ կարող ասել: Ես՝ ինքս, բացակայում եմ միայն այն դեպքում, երբ ունենում եմ առողջական խնդիրներ կամ էլ պարզապես երկրում չեմ լինում:

- Մենք տեղեկություն ունենք, որ իշխանություններն ավագանու առկա պատկերից գոհ չեն: Փաստ է, որ ՔՊ-ն կախված է «Հանրային ձայնից» եւ «Հանրապետությունից»: Ասում են` անգամ քննարկում են նոր ընտրությունների գնալու հարցը: Ավագանին լուծարելու օրինական ճանապարհներ կան` օրինակ, եթե «Հանրապետությունն» ու «Հանրային ձայնը» չմասնակցեն մի քանի ավագանու նիստերի:

- Անկեղծ ասած, չէի լսել նման խոսակցություն: Ամեն դեպքում, իշխանությունները պետք է հասկանան, որ փաստացի կախված են «Հանրային ձայն» ընդդիմադիր ներկայացող խմբակցությունից: ՔՊ-ն կախված է «Հանրային ձայնից», սա փաստ է: Եթե իշխանությանն այդ կարգավիճակը դուր է գալիս, ապա թող այդպես էլ շարունակեն: Չեմ կարող ասել` կգնա՞ն նոր ընտրությունների, թե՞ չեն գնա, այս իշխանության մտքի թռիչքն անհասկանալի է:

- Իսկ նոր ընտրությունների դեպքում ՔՊ-ն կունենա՞ շանսեր՝ ավելի շատ քվեներ ստանալու:

- Ամեն իշխանություն ունի վարչական ռեսուրսների կիրառման հնարավորություն: Եթե ՔՊ-ն գնա նոր ընտրությունների, չենք կարող ասել՝ կհաղթե՞ն, թե՞ չեն հաղթի: Կարող է այնպես լինել, որ ընդդիմությունը հաղթի: Ամեն դեպքում, այդ պարագայում Երեւանն ավելի կայուն կառավարում կունենա, եւ իշխանությունն ընդդիմադիր մեկ խմբակցությունից կախված չի լինի:

- Բայց եթե իշխանություններն անարդյունավետ են աշխատում, էակա՞ն է, թե ումից կախված կլինեն….

- Կարծում եմ՝ էական է այն առումով, որ աննորմալ է, երբ իշխանությունն իր իշխանությունն իրացնում է ընդդիմության շնորհիվ: Անոմալիկ երեւույթ է Երեւանի քաղաքապետարանում: Նման բան տեղի չի ունեցել: