Պետական գույքի կառավարման կոմիտեի նախագահ Նարեկ Բաբայանը «Հրապարակի» հետ զրույցում քիչ առաջ հաստատեց, որ աշխատանքից ազատման դիմում է գրել։ Ավելի վաղ մենք գրել էինք, որ մեր տեղեկություններով՝ աշխատանքից ազատման դիմում է գրել, և այս պահին կոմիտեում հավաքել է վարչության պետերին և հրաժեշտ է տալիս նրանց։
Մենք գրել էինք նաև, որ ըստ մեր աղբյուրների, նման որոշման պատճառը տարածքային կառավարման և ենթակառուցվածքների նախարար Սուրեն Պապիկյանի հետ շատ լարված հարաբերություններն են, մասնավորապես՝ Պապիկյանը Բաբայանին արգելել է վարչապետ Նիկոլ Փաշինյանի և կառավարության հետ ուղիղ շփումներ ունենալ, և Բաբայանը այդ անելանելի իրավիճակից լուծումը տեսել է դիմում գրելն ու հեռանալը։
Մեզ հետ զրույցում Բաբայանը հերքեց այս տեղեկությունը, սակայն չասաց, թե որն է իր հեռանալու պատճառը՝ պատճառաբանելով, որ այս մասին արդեն ասել է այլ լրատվամիջոցների, իսկ այլ լրատվամիջոցների Բաբայանն ընդամենը ասել է հետևյալը, որ դիմումի պատճառը «աշխատանքային է»։
Հիշեցնենք, որ Նարեկ Բաբայանը ԱԺ փոխխոսնակ Լենա Նազարյանի ամուսինն է։
