Փոխգնդապետին ծեծի ենթարկելու գործով միակ մեղադրյալին ազատելու միտում կա

Փոխգնդապետին ծեծի ենթարկելու գործով միակ մեղադրյալին ազատելու միտում կա

2019 թվականի սեպտեմբերին Եղեգնաձորում ծեծի ենթարկված փոխգնդապետ Արա Մխիթարյանի գործով քննչական մարմինները ոչ թե նախաքննություն են իրականացնում, այլ մեղադրյալներին գործից հանելու օպերացիա: Օգտագործվում է դեռեւս նախկինների օրոք մշակված ու 100 տոկոսով աշխատող սխեմա: Հանրային ճնշման ներքո մի քանի մեղադրյալ են ներգրավում, հետո գործից մաս են անջատում, ապա մեղադրյալներից մեկին տանում են դատարան, իսկ մյուսի մասով գործը կարճում են՝ վերացնելով նաեւ մեղադրյալի կարգավիճակը: Այսպես եղավ փոխգնդապետ Մխիթարյանի գործով:

Սկզբում նրան դաժան ծեծի ենթարկելու միջադեպի առիթով մեղադրանք առաջադրվեց նախկին մարզպետ Տրդատ Սարգսյանի (Տ․ Սարգսյանը ներկայում ՔՊ աշխատակազմի ղեկավարն է) օգնական Հարություն Գրիգորյանին՝ դիտավորությամբ անձին ծանր մարմնական վնաս պատճառելու համար: Հետո՝ հոկտեմբերին, դեպքից մեկ ամիս անց, խմբի կազմում փոխգնդապետի առողջությանը դիտավորությամբ ծանր վնաս պատճառելու համար մեղադրանք առաջադրեցին եւ կալանավորեցին Հարությունի եղբորը՝ Զավեն Գրիգորյանին։ Նոյեմբերին արդեն քննիչները որոշեցին, որ Վայոց Ձորի նախկին մարզպետ Տրդատ Սարգսյանը, որի՝ դեպքի վայրում լինելու վերաբերյալ ԶԼՄ-ներում բազմաթիվ տվյալներ կան, 2019 թվականի սեպտեմբերի 17-ին տեղի ունեցած վիճաբանությանն ականատես չի եղել: 2020 թվականի մարտին արդեն Զավեն Գրիգորյանին 1.5 միլիոն դրամ գրավի դիմաց ազատ արձակեցին: Գործից մաս է անջատված, որն այլեւս առնչություն չունի Արա Մխիթարյանին ծեծի ենթարկելու հետ: Փաստորեն, այժմ, ըստ քննիչների, Մխիթարյանին կոմայի հասցնողը Հարություն Գրիգորյանն է, որը կալանքի տակ է: 

Տուժողի ներկայացուցիչ, իրավապաշտպան Արտակ Գալստյանը կարծում է, որ նրան էլ են ուզում ազատել պատասխանատվությունից: «Միտում կա խափանման միջոցը փոխելու,- ասում է Արտակ Գալստյանը,- այդ են վկայում ամեն դատական նիստին խափանման միջոցի փոփոխության միջնորդությունները: Կոպիտ ասած՝ 4 դատական նիստից երեքին դատարանը խափանման միջոց է քննարկել: Կարծում եմ, ՔՊ-ի կողմից միտում կա, որ Հարություն Գրիգորյանին էլ ազատեն»: Մայր գործից մաս անջատելը նա քննչական տրյուկ է համարում: Իրավապաշտպանից հետաքրքրվեցինք, թե դատական ինչ փուլում է Արա Մխիթարյանի գործը:  «Վկաների հարցաքննության փուլն է դատարանում: Երեք վկա է հարցաքննվել, որոնք պնդել են, որ մարզպետը տեղում է եղել»,- ասում է Արտակ Գալստյանը:

Վկա զինվորականներից մեկը՝ Լեւոն Հարությունյանը, դատարանում հայտարարել է, որ ինքը Վայոց Ձորի նախկին մարզպետի հետ դեպքի վայրում 40 րոպե խոսել է: Արա Մխիթարյանի հորից էլ հետաքրքրվեցինք, թե ինչ վիճակում է որդին: «Անփոփոխ: Տանը պառկած է, կոմայի մեջ»: