ՔԿ-ն տրանս կնոջը վերադարձրել է առգրավված 27 հազար դոլարը
Աննա Պապիկյան
5 Հոկտեմբեր 2023 | 19:03
0
Քննչական կոմիտեն վերադարձրել է Դիլլա անունով տրանս կնոջից առգրավված 27 հազար դոլար գումարը։ Այս մասին «Հրապարակ»-ին հայտնեց «Իրավունքի կողմ» ԼԳԲՏ համայնքի իրավունքների պաշտպանությամբ զբաղվող իրավապաշտպան հասարակական կազմակերպության նախագահ Լիլիթ Մարտիրոսյանը:
Նա նշեց, որ գումարը վերադարձվել է իրենց ներկայացուցչի միջնորդության բավարարման արդյունքում։
Այս գործով տրանս կինը ունի վկայի կարգավիճակ, ըստ փաստաբանի, 3 ամիս է որեւէ քննչական գործողություն չի իրականացվել։
Քննչական կոմիտեից էլ գործի վերաբերյալ մեզ փոխանցեցին ․«Տվյալ անձին առնչվող հանգամանքները քննության առարկա են ՀՀ քննչական կոմիտեի ՀԿԳ գլխավոր վարչությունում քննվող հսկայածավալ քրեական վարույթի շրջանակներում։ Այդ վարույթով, որն առնչվում է «Տելեգրամ» ալիքների միջոցով իրականացվող թմրամիջոցների ապօրինի շրջանառության բազմաթիվ դրվագներին, մեծածաված քննչական, դատավարական գործողությունները շարունակվում են»:
Նշենք, որ տրանս կինը պնդում էր, որ ինքը որեւէ առնչություն չունի այս գործի հետ, իր հաճախորդը գողացել է իր հեռախոսը, փոխանցում կատարել իր համար անծանոթ անձի, որն էլ թմրամիջոցների ապօրինի շրջանառության դրվագների մասնակից է։
Կարծիքներ