Օրերս Երևանի քաղաքապետարանում հանրային լսումներ էր կազմակերպվել` ավտոկայանատեղիների վճարների նոր դրույքաչափերի թեմայով: Բանն այն է, որ ՔՊ-ական ավագանին որոշել է նոր, ահռելի բարձր դրույքաչափեր սահմանել կենտրոնում կայանելու համար, ինչը հասարակության շրջանում վրդովմունք է առաջացրել: Հանրային քննարկման ժամանակ Երևանի ավագանու «Մայր Հայաստան» խմբակցության անդամ, ազատամարտիկ Նարինե Հայրապետյանը` Նարե Սոսեն, միակ սուր ելույթն ունեցած ավագանու անդամն էր: Նա հայտարարեց, որ անընդունելի է երևանցիների հետ այդպես վարվելը, որ Փաշինյանն առաջ արագաչափերն էր սկոտչում, իսկ այժմ անում է իր՝ նախկինում տված խոստումների ճիշտ հակառակը: Զրուցել ենք Նարինե Հայրապետյանի հետ:
- Հանրային լսումների ժամանակ միայն Դուք ակտիվ եւ կտրուկ ելույք ունեցաք: Ինչո՞վ էր մնացյալի լռությունը պայմանավորված:
- Ցանկացած գործողություն, որը վերաբերում է մարդկանց առօրյան խաթարելուն, անընդունելի է ցանկացած նորմալ հայ մարդու համար, ի դեպ, կապ չունի` ընդդիմադիր ես, թե կառավարության անդամ: Չի կարող այդ ամենը լինել ընդունելի, ինչպե՞ս ես հանդուրժում այս վերաբերմունքը: Եթե դու իսկապես քո ժողովրդի բարեկեցիկ կյանքի համար մտահոգ ես, ապա անհնար է, որ այս բեռը քեզ համար ընդունելի լինի: Կենտրոնը ոչ թե բեռնաթափում են, այլ հայաթափում, շատ լավ հասկանալով, որ վնասում են հայաբնակեցմանը:
- Փաստորեն իշխանությունն անում է իր տված խոստումների ճիշտ հակառակը:
- Ակնհայտ է: Ասում էին` կարմիր գծեր գոյություն չունեն, պարզվեց` իրենց ասածի հակառակն է միշտ լինում…. ինչ վերաբերում է տեսախցիկներ փակողին, ապա նա բոլոր հնարավոր միջոցներով կեղեքում է ժողովրդին: Այս ձևով նաև փոքր բիզնեսին են վնասում: Մեծ բիզնես ունեցողն էլի կարողանալու է իր գործն անել, բայց փոքր և միջին բիզնեսը սրանից էլ են տուժելու: Տուրքեր, հարկեր են հորինում, ծխախոտի համար տուգանում են, ինչ ասես անում են և ոչ մի բան հայ ժողովրդի շահերից չէ: Այնպես են անում, որ հայ մարդն այս պայմաններից զզվի և ելքեր փնտրի՝ ապահով կյանքով ապրելու: Դատելով թուրքերի հետ բարեկամանալու նրանց մոլուցքից, հավանաբար Երևանի կենտրոնը, հետագայում ողջ Երևանը վերածելու են սպասարկման կենտրոնի: Կազինոներ, հյուրանոցներ, զվարճանքի վայրեր, Երևանը փորձում են դարձնել սպասարկման կենտրոն: Սկզբում մարդկանց կենտրոնից կքշեն տարբեր անկյուններ, հետո էլ կասեն, որ նաև մայրաքաղաքն է ծանրաբեռնված ու կանեն այն, ինչ ուզում են: Ես՝ որպես ազատամարտիկ, անելու եմ ամեն հնարավոր բան, որ թուրքը Երևան չմտնի:
- Իսկ այս թեմայով հանրային լսումներից ի՞նչ պարզ դարձավ:
- Թույլ չենք տալու այսպես կործանեն երկիրը: Մեր տղերքին կոտորեցին, «ազատամարտիկ» բառից են հրաժարվում, հիմա այլ բաներ են փորձում անել, բայց չի ստացվելու, նրանք շատ փոքր ճիվաղներ են, ինչ-որ բան անելու համար: Արցախն էլ հայաթափեցին, մեր ժողովրդի ցավի վրա են խաղում: Տղերքին տարան զոհեցին…. որովհետև տեր չկանգնեցին: Հիմա էլ ասում են` եթե չեք ուզում այդ ամենի կրկնությունը, պետք է ամեն ինչի հետ համակերպվեք: Մեր ժողովուրդը հուսալքված է, բայց չեմ կարծում, որ հայն այն տեսակն է, որը կարող է երկար չոքած մնալ:
