Ավտո չկա, ոնց ուզում եք հասեք. Վարժական հավաքի մասնակիցներին մեքենա չեն տրամադրել
Երեկ մենք լուր էինք գրել, որ 25-օրյա վարժական հավաքների մասնակիցներին դիրքերից իջեցրել են Վարդենիս համայնքի Ծովակ գյուղի մոտ, չտրամադրելով ավտոբուս, որպեսզի մասնակիցները հասնեն իրենց բնակավայրեր: Որից հետո վարժական հավաքի մասնակիցները փակել էին Մարտունի-Վարդենիս միջպետական ավտոմայրուղին:
«Հրապարակ»-ի հետ զրույցում հավաքի մասնակիցներից Հովհաննես Վարդանյանը նշեց, որ իրենց դիրքերից իջեցրել են Ծովակ գյուղի մոտ և 2-րդ բանակային կորպուսի հրամանատարությունից ասել են, որ ոնց ուզում եք գնացեք հասեք:
«Ժամանակին տանում են դիրքեր, տուն-տեղ թողած գնում ենք, պոստ ենք պահում, երբ վերջանում է, ավտո չեն տրամադրում, որ մեր երեխաներին հասնենք, ամեն մեկը իրենց գումարով պետք է անեն դա, այսպես են բանակ պահում:
Մեր տղերքից մեկը խոսել է բանակային կորպուսի հրամանատարի հետ, իրեն ասել է, որ ավտո չկա, ոնց ուզում եք հասեք»:
Մեր այն հարցին, թե ինչպես եք հետ վերադարձել, Վարդանյանը նշեց. «Վեճից հետո (փողոց փակելուց խմբ.) նոր ավտո են տրամադրել»:
Այն հարցին՝ ձեզ տեղեկացրե՞լ են արդյոք, որ ավտոբուսը ընդամենը ուշանում է, պատասխանեց. «Մեզ նման բան չեն ասել»:
Կարծիքներ