Կարող եք հենց Դուք էլ հրապարակել, դա էլ կլինի աղմկահարույց վերնագիր

Կարող եք հենց Դուք էլ հրապարակել, դա էլ կլինի աղմկահարույց վերնագիր

Հարցազրույց ԱԺ «Իմ քայլը» խմբակցության պատգամավոր Հայկ Սարգսյանի հետ

- Պարոն Սարգսյան, ընդդիմությունը պահանջում է ԿԳՄՍ նախարար Արայիկ Հարությունյանի հրաժարականը, ասում են՝ նա տապալել է ոլորտը։ Ի՞նչ կասեք այս մասով։

- Ընդդիմության ներկայացրած փաստերից որեւէ մեկը իրականությանը չի համապատասխանում կամ գրեթե չի համապատասխանում, եւ նախարարը շատ հստակ ու հանգամանալի բոլոր հարցերին անդրադարձել ու պարզաբանումներ է տվել։ Ես դժվարանում եմ հասկանալ՝ իրենց միտումը, ընդհանրապես, որն է։ Օրինակ՝ «Լուսավոր Հայաստանի» պատգամավոր Անի Սամսոնյանն ասում է, որ Արայիկ Հարությունյանի՝ նախարար նշանակվելուց հետո ուսուցիչների մոտ վախի մթնոլորտը երկու անգամ մեծացել է։ Դա աբսուրդ է ուղղակի։ Այսինքն՝ այն ժամանակ ո՞նց է եղել, որ դպրոցում կես դրույքով աշխատող դասատուից, հավաքարարից սկսած՝ որեւէ մեկն իրավունք չի ունեցել որեւէ քաղաքական միջոցառման մասնակցի կամ անգամ մտածի, որ կարող է մտնի նախարարի ֆեյսբուքյան էջում վատ մեկնաբանություն գրի։ Այսինքն՝ վախի ռեալ մթնոլորտ է եղել, բոլորս դրա մասին գիտենք, չէ՞։ Ու Անի Սամսոնյանը բերում է ՀՀԿ-ի ամենավատ ժամանակվա, վախի մթնոլորտի ուռճացված ժամանակվա հետ համեմատություն է անում ու ասում է, որ հիմա երկու անգամ ավելի վատ է վիճակը։

- ԱԺ-ում ընդդիմության առաջարկով քննիչ հանձնաժողով ձեւավորվեց, որը պետք է քննի կառավարության պայքարը համավարակի դեմ, քանզի կարծում են, որ սխալ պայքար է տարել, դրա համար էլ հազարից ավելի մահ ունենք այսօր։

- Ես եւ մեր խմբակցությունը կողմ ենք քվեարկել քննիչ հանձնաժողովի ձեւավորմանը։ Դե, հիմա կկազմվի, թող իրենք ասեն՝ ինչն ենք սխալ արել, փաստեր նշեն, մենք շատ շնորհակալ կլինենք, որ մեր սխալները ցույց տան։ Թող աշխատեն՝ ասեն։

- Անդրադառնանք Ձեր անձին։ Վերջերս Դուք էլի հայտնվեցիք լրատվամիջոցների ուշադրության կենտրոնում՝ Սեւանի հայտնի փարթիին մասնակցելով, հետո գրվեց, որ «Իմ քայլում» Ձեր հարցն է բարձրացվել, փորձել են պատժել, բայց Դուք ջրից չոր եք դուրս եկել։

- Դրանք ամբողջությամբ հորինված եւ կարդացվող վերնագրեր են, չկա նման բան, անգամ չեմ ցանկանում մեկնաբանել, այ, տենց իրականությանը չհամապատասխանող բաներ են։

- Հատկապես ո՞ր մասն իրականությանը չի համապատասխանում, որ Դուք մասնակցե՞լ եք այդ փարթիին, թե՞ որ Ձեր հարցը քննարկվել է խմբակցությունում։

- Ամբողջությամբ։ Ես փարթիի չեմ մասնակցել, ես եղել եմ միջոցառմանը մի պահ, դրա մասին իմ ֆեյսբուքյան էջում նշել եմ։

- Բայց Ձեր գրածն այնքան էլ արժանահավատ չթվաց, շատերը  հեգնեցին, թե գնացել էիք, փաստորեն, ինտերնետը կարգավորելու։

- Դա Ձեր մասնավոր կարծիքն է, ինձ հակառակն է հասել․․․ Այո, կան շրջանակներ, ովքեր մտածում են, որ իմ ասածն արժանահավատ չէ։

- Այսինքն՝ իսկապե՞ս Ձեզ հրավիրել էին լողափի ինտերնետը կարգավորելու։

- Ես մշտապես հանգստացել եմ Սեւանում ամառները, հիմնականում՝ Շորժայի լողափում, դեռեւս 1990-ական թվականներից, երբ ես փոքր էի։ Եվ այս տարի նույնպես ես հանգստացել եմ Սեւանում, եղել եմ բազմաթիվ լողափերում, այդ թվում նաեւ եղել եմ այդ լողափում։

- Ի՞նչ նպատակով եք այդ օրը եղել «Սպիտակ Շորժա» լողափում։

- Հանգստանալու նպատակով էի եղել այնտեղ։

- Այդ դեպքում ինչո՞ւ էր լողափի տնօրենն ասել, թե մտել էիք ինտերնետը կարգավորելու։

- Չեմ հիշում, կարող է լավ չի ֆիքսել ինքը։

- Լավ, Դուք օրենսդիր մարմնի ներկայացուցիչ եք, բազմաթիվ մարդկանց պես՝ Դուք էլ եք այդ օրը այդ լողափում առանց դիմակի եղել, այսինքն՝ Ձեր իսկ սահմանած կարգն եք խախտել։

- Մեր իսկ սահմանած կարգը ես․․․ տեսեք, օրինակ, ո՞նց ասեմ, չկան մարդիկ, ովքեր կարգ չեն խախտում։ Դա կլինի, օրինակ, ամենահասարակ խախտումներից սկսած՝ մի ակնթարթ դիմակը հանել, ջուր խմելուց հետո ուշ դնել կամ սպորտով զբաղվելու ընթացքում հանել դիմակը, հետո անմիջապես վերջացնելուց հետո դիմակը չկրել, այսինքն՝ դա մեկնաբանելը շատ սպեցիֆիկ է, ու կարելի է ցանկացած մարդու օրվա ընթացքում հայտնաբերել ուտելուց անմիջապես հետո դիմակ չկրելուց․․․ Օրինակ՝ Ձեզ հետ չի՞ եղել, որ օրվա մեջ հանում եք դիմակը։

- Եղել է, ես հենց հիմա էլ առանց դիմակի եմ, ինչպես նաեւ՝ Դուք, այսինքն՝ ես էլ եմ կարգ խախտում, Դուք էլ, նաեւ այս շենքում շատերը։ Բայց պատգամավորներին քննադատում են, որ իրենք այդ կարգն ընդունել են ու իրենք էլ խախտում են ոչ թե զուտ մի պահ դիմակը հանելով, այլ հանրային մեծ միջոցառումների մասնակցելով, օրինակ։

- Նորից եմ ասում՝ ես չեմ գնացել միջոցառման մասնակցելու, այդ միջոցառումից մեկ օր առաջ էլ ես եղել եմ լողափում։ Այսինքն՝ այդ միջոցառումը կազմակերպվել է, իմ կամքից անկախ՝ ես հայտնվել եմ այդ միջավայրում, բայց ոչ թե ես գնացել էի միջոցառման մասնակցելու, այլ միջոցառումը բերել եւ կազմակերպել էին այդ լողափի հարակից տարածքում։  Ու ես՝ ինքս, դիմել եմ ոստիկանությանը եւ ասել եմ, որ, այո, հաշվի առնելով նաեւ քննադատությունները՝ ես վարչական պատասխանատվության եմ ենթարկվել՝ վճարելով 10 հազար դրամ, ինչպես մեր 100 հազարավոր քաղաքացիները։

- Ձեր անունը, այդուհանդերձ, շատ է շրջանառվում մամուլում, ասում են՝ քրեական հեղինակությունների հետ կապ ունեք, նույնիսկ որոշների համար տանիք եք հանդիսանում, ինչ-որ հարցեր եք լուծում՝ Ձեր դիրքն օգտագործելով։

- Իմ անձի շուրջ շատ են սուտ, կեղծ ինֆորմացիաներ պտտվում, եւ դրանք ուղղորդված են, բնականաբար, որոշ լրատվականներ էլ ընկնում են էդ ռիթմի մեջ ու շարունակում են էդ ոճով նյութեր գրել՝ հաշվի առնելով, որ ընթերցվող կարող են լինել նման տեղեկատվությունները։

- Իսկ ո՞ւմ կողմից է ուղղորդված, ովքե՞ր Ձեր դեմ ինչ-որ բան ունեն, ովքե՞ր են ուզում Ձեզ վարկաբեկել։

- Միայն իմ դեմ չէ, մեր իշխանության դեմ։

- Բայց Ձեր իշխանությունից բոլորը չէ, որ հայտնվում են լրատվական նման գլխագրերում, իրենց վարքով կամ ակտիվությամբ, ուրեմն, նպաստում են, չէ՞, դրան։

- Ես էլ եմ ուզում հասկանալ՝ ինչով եմ աչքի ընկնում։ Օրինակ, Դուք ի՞նչ կարծիք ունեք իմ մասին։ Դուք, ի տարբերություն մեր քաղաքացիների, ովքեր ինձ միայն մամուլով են հետեւում, ինձ պարբերաբար տեսնում եք Ազգային ժողովում, տեսնում եք՝ ես ում հետ եմ հարաբերվում, ինչպես եմ հարաբերվում, ինչպես եմ հագնվում, երբ եմ ընդմիջում անում կամ, ընդհանրապես, ինձ ոնց եմ պահում։

- Բայց ես Ձեզ չեմ տեսնում ԱԺ-ից դուրս՝ այլ միջավայրում, մինչդեռ այդ մասին մեզ պատմում են, որ Դուք քրեական ենթամշակույթ կրող անձանց հետ եք պարբերաբար հանդիպում, նաեւ տեսանյութեր հայտնվեցին, որ Դուք եւ Պզոն միասին միջոցառման եք մասնակցում։

- Իմիջիայլոց, այդ թեմայով դատական հայցը ես կրել եմ, դրա մասին դեռեւս չեմ հրապարակել, կարող եք հենց Դուք էլ հրապարակել, դա էլ կլինի աղմկահարույց վերնագիր, որ դատարանը բավարարել է իմ հայցադիմումն ընդդեմ Armday.am կայքի եւ պարտավորեցրել վճարել իմ կողմից պահանջվող գումարը, ինչպես նաեւ փաստաբանական ու դատական ծախսերը։

- Այսինքն՝ Դուք պնդում եք, որ հիմա որեւէ քրեական հեղինակության հետ որեւէ առնչություն չեք ունեցել կամ չունե՞ք։

- Այո, չեմ ունեցել եւ չունեմ, ցանկություն էլ չունեմ ունենալու։ Եվ ես կողմ եմ քվեարկել քրեական մշակույթը կրող, հարող մարդկանց նկատմամբ քրեական պատասխանատվություն սահմանելուն։ Եվ ես գտնում եմ, որ սա նույնիսկ ուշացած էր Հայաստանում, քանի որ մեր թե՛ դպրոցները, թե՛ բանակը, թե՛ կրթական այլ հաստատություններն ամբողջությամբ ներծծված են եղել քրեական ենթամշակույթի մեջ, հարցերը տարիներ շարունակ լուծվել են քրեական աշխարհի կանոններով։

- Բայց ասում են՝ ընտրություններին Ձեր թիմակիցները տարբեր ընտրատարածքներում շատ լավ օգտվել են այդ քրեական հեղինակությունների ռեսուրսներից։ Ու նույնիսկ այդ շրջանակից են հաստատում, որ իրենք օգնել են Ձեր թիմակիցներին։

- Ես չեմ կարծում, առաջին անգամ եմ լսում նման բաներ։