Վերջին տարում Բարձրագույն դատական խորհրդում քննվող կարգապահական վարույթների նիստերը տեղի են ունենում նոր վերանորոգված դահլիճում։ Այն վերանորոգվել եւ կահավորվել է ԲԴԽ նախագահ Կարեն Անդրեասյանի ճաշակով, դահլիճի ամբողջ կահույքը փայտյա է, անգամ օդորակիչների պատյաններն են փայտից։ Վարագույրները մուգ կարմիր են, որպեսզի համադրելի լինեն դահլիճի ինտերիերի հետ։ Անդրեասյանը ցանկացել է աթոռների թիկնակի գույնը համապատասխանեցնել վարագույրների գույնին։ Դահլիճը մինչ վերանորոգումը գտնվում էր շատ լավ վիճակում, աչք չհոգնեցնող ինտերիեր ուներ, սակայն Անդրեասյանին այն դուր չի եկել, որոշել է փոխել։
Այս փոփոխությունը նա նախաձեռնել է իր գալուց հետո։ Բարձրագույն դատական խորհրդին «Հրապարակ»-ը գրավոր հարցում է ուղարկել՝ պարզելու, թե վերանորոգման եւ կահույքի ձեռքբերման համար որքան գումար է ծախսվել, մրցույթ հայտարարվե՞լ է՝ վերանորոգող ընկերությունը որոշելու համար, եւ եթե, այո, ապա ո՞վ է հաղթել։
Եվ, ահա, ԲԴԽ-ից ստացել ենք հարցման պատասխանը. «Բարձրագույն դատական խորհրդի նիստերի դահլիճի վերանորոգման համար ծախսվել է 9 միլիոն 914 հազար 164 դրամ։ Բարձրագույն դատական խորհրդի նիստերի դահլիճի կահույքի ձեռքբերման համար ծախսվել է 13 միլիոն 738 հազար 977 դրամ։ Դատական դեպարտամենտի կարիքների համար Բարձրագույն դատական խորհրդի նիստերի դահլիճի վերանորոգման եւ կահավորման աշխատանքների ձեռքբերման նպատակով՝ 2023 թվականին «Գնումների մասին» ՀՀ օրենքի 15-րդ հոդվածի համաձայն, գնանշման հարցման ձեւով, կազմակերպվել է գնման ընթացակարգ, ընթացակարգին մասնակցել է 3 մասնակից: Մասնակիցների կողմից ներկայացված հայտերի ուսումնասիրության արդյունքում՝ սահմանված տեխնիկական բնութագրին համապատասխան ներկայացրած եւ բավարար գնահատված (նվազագույն գնառաջարկ ներկայացրած) մասնակցի՝ «ԷՔՍԻՏՈ» ՍՊԸ-ի հետ 20.12.2023 թվականին կնքվել է պայմանագիրը»։
Ստացվում է, որ Անդրեասյանի աչքին ոչ հաճելի, բայց նորմալ վիճակում գտնված դահլիճի վրա հերթական «միլիոնները» ծախսվեցին քաղաքացիների գրպանից։
