Մենք հակակոռուպցիոն ՀԿ ենք, այլ ոչ թե իրավապաշտպան. Հոկտանյան

«Հրապարակի» զրուցակիցը «Թրանսփարենսի ինթերնեշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանն է:

- Պարոն Հոկտանյան, քաղհասարակության պասիվությունն ինչո՞վ կբացատրեք: Ադրբեջանական ագրեսիայի հետևանքով հայկական կողմն ունի բազմաթիվ ռազմագերիներ, զոհվածներ: Գերի են տարվել Արցախի նախկին նախագահները, զինվորականները:

- Ճիշտն ասած, այդ հարցին ես այնքան էլ չեմ տիրապետում: Ես հասարակական գործունեություն ծավալում եմ, սակայն ոչ որպես որոշում ընդունող: Պետք է որոշում ընդունողներն այդ մասին որոշեն:

- ՄԱԿ-ի դիտորդները հոկտեմբերի 1-ին Ստեփանակերտում արձանագրել են, որ ադրբեջանցիները հայերին Արցախից չեն տեղահանում, չեն սպանում և չեն սադրում:

- Մենք կոնկրետ բառի նեղ իմաստով իրավապաշտպաններ չենք: Մեզ իզուր եք ներառում իրավապաշտպանների մեջ:

- Բայց դուք քաղհասարակության անդամներ եք: Ինչո՞ւ իզուր:

- Մենք հակակոռուպցիոն ՀԿ ենք, այլ ոչ թե իրավապաշտպան:

- Դուք նախկինում բավականին ակտիվ էիք:

- Երբ ես էի գործադիր տնօրենը, մշտապես վերապահումով էի մոտենում այդ հարցերում հայտարարություններ տարածելուն: Ես անձամբ` չեմ արել նման հայտարարություններ: Եթե մենք տեսնում ենք կոռուպցիոն հարցեր, այդ դեպքում հայտարարությամբ ենք հանդես գալիս: Ինչ վերաբերում է Արցախում տիրող իրավիճակին, ապա մեր կայքում հայտարարություններ այդ մասին եղել են, նախքան այս: Կոնկրետ այս դեպքերի հետ կապված հայտարարություն երևի կլինի, ենթադրում եմ, որ դա ժամանակի հարց է: Ես չեմ կարող ինչ-որ բան որոշել: Ինչ վերաբերում է ՄԱԿ-ի դիտորդների հայտարարությանն, ապա ես դա լուրջ փաստաթուղթ չեմ էլ համարում: ՄԱԿ-ի հայտարարությունն արժանի չէ ոչ մի գնահատականի, որովհետև նախքան սեպտեմբերի 19-ին տեղի ունեցածն էլ էթնիկ զտման փորձեր էին արվում և եթե այդ ամենը ՄԱԿ-ը չի տեսնում, դա արդեն իր պրոբլեմն է, ուրեմն կարճատես են ու ակնոցներ չեն հագել Արցախ գնալուց առաջ:

- Այդ առումով քաղհասարակությունն ունի՞ անելիք` աշխարհին իրականությունը ներկայացնելու:

- Ես չգիտեմ, թե քաղհասարակության մյուս ներկայացուցիչներն ինչ են մտածում: ՀՀ ԱԳՆ-ն այդ մասին խոսել է, ես որպես հակակոռուպցիոն ոլորտի ներկայացուցիչ, կցանկանայի, որ քաղհասարակության ներկայացուցիչներն իրենց ունեցած կոնկրետ պրոֆիլների մասին խոսեն: Ես անձամբ այդ հարցերում պրոֆեսիոնալ չեմ: Ես կողմնակից եմ, որ ինչ-որ հարցի մասին խոսելուց առաջ, նախ տվյալ ոլորտի հմուտ մասնագետը լինես: Ես դրա մասնագետը չեմ: Ես իմ ոլորտի մասին կարող եմ պրոֆեսիոնալ խոսել: ՀԿ-ները պետք է խոսեն այն հարցերի վերաբերյալ, որոնց մեջ մասնագիտացված են: