4 երեխա ունեցող Աննա Հակոբյանը մեկնելու է առաջնագիծ, 3 երեխա ունեցողներին՝ մերժում են

Այն կանայք, որոնք ունեն 3 եւ ավելի երեխա ու ցանկանում են մեկնել առաջնագիծ, նրանց մեկնումն արգելվում է։ Բանն այն է, որ հստակ նորմով ամրագրված է՝ մի քանի երեխաներ ունեցող կինը չի կարող մեկնել սահման։ Օրերս էլ նման դեպքեր են տեղի ունեցել, երբ կամավորական ջոկատներ են փորձել կազմել՝ նրանցում ընդգրկված մի քանի երեխա ունեցող մայրերին ետ են դարձրել։

Հիմա տեղին հարց է առաջանում՝ 13 հոգանոց կանանց ջոկատ կազմած Նիկոլ Փաշինյանի կինը՝ Աննա Հակոբյանը, որը 4 երեխաների մայր է (երկուսը՝ անչափահաս) ինչպես կարող է մեկնել առաջնագիծ, եթե մյուսներին չեն թույլատրում։ Նշենք, որ Աննա Հակոբյանի առաջնագիծ մեկնելու մասին հենց տիկինն էր հայտնել։ «Մի քանի օրից կմեկնենք մեր հայրենիքի սահմանները պաշտպանելու։ Մենք ոչ հայրենիք, ոչ արժանապատվություն չունենք թշնամուն զիջելու»,- գրել էր Հակոբյանը ֆեյսբուքում։ Հոկտեմբերի 27-ից էլ նրա ջոկատը զինվորական պարապմունքներ է սկսել Գորիսի մոտակայքում։ Թե ինչքանով են ինտենսիվ պարապմունքներ անում Հայոց աշխարհի փափկասուն տիկնայք, դժվար է ասել, ամեն դեպքում ակնհայտ է երկակի մոտեցումը։

«Զինվորի մայր» հասարակական կազմակերպության նախագահ Մարգարիտա Խաչատրյանը, որը տեղյակ էր օրենքից, մեզ հետ զրույցում այս թեմայի վերաբերյալ նշեց․ «Երկու երեխա ունեցող կանանց էլ չեն տանում։ Թույլ չեն տալիս մեկնեն, եթե իրենք զինապարտության օրենքով զինգրքույկ չունեն, եթե զինապարտության չեն անցել՝ իրենք զինակոչի ենթակա չեն։ Եթե հաշվարկված չեն պահեստազորում, գնալու են ճանապարհից հետ գան»։ Նա նաեւ նշեց, որ տարբեր ՀԿ-ներից կանայք գնացել են, բայց նրանց ետ են ուղակել․ «Տարիքային տարբերակ է եղել, երեխա ունենալու հարցը չի եղել, որովհետեւ իրենք կռված կանայք էին։ 5 օրով եկել էին, հիմա էլի փորձել էին գնային, ասել էին՝ չէ»։

Թեմայից դուրս նա նաեւ նշեց, որ իրենց ՀԿ-ին շատ մայրեր են դիմում․ «Շատ -շատ են դիմում, եթե թեժ գիծը չի պատասխանում, հարցնում են՝ պատերազմական վիճակում ի՞նչ խնդիրներ կլինեն։ Ամեն հարցում փորձում եմ օգնել, ոչ մեկին չեմ մերժում, հեռախոսս իրենց տրամադրության տակ է։ Զինվորները զանգում են, ինչ պահանջեր կան, ուղարկում ենք»։

Նշենք, որ ավելի վաղ, «Հրապարակ»-ի հետ զրույցում Աննա Հակոբյանի սահման չմեկնելու վերաբերյալ եւս մեկ փաստարկ բերել էր  ՀՀ նախագահի ազգային անվտանգության հարցերով նախկին խորհրդական Գառնիկ Իսագուլյանը։ Նա ասել էր․ «Ես կարծում եմ՝ թիկնապահների պարտականությունների մեջ մտնում է հետեւյալը․ եթե այն պաշտոնատար անձը կամ պաշտոնատար անձի ընտանիքի անդամները, ովքեր գտնվում են թիկնազորի հսկողության տակ, երբ նրանց կյանքին որեւէ առումով վտանգ է սպառնում, չեն ենթարկվում տվյալ անձին եւ կատարում են իրենց կանոնակարգով նախատեսած գործողությունները։ Այս պարագայում, ես կարծում եմ՝ սպասարկող թիկնազորի տղաները ուղղակի պետք է թույլ չտան, որ տիկին Աննան գնա վտանգավոր գոտի, ուղղակի պետք է արգելել։ Իսկ, եթե իրենք այլ բան կատարեն, կնշանակի, որ չեն կատարել իրենց ծառայողական պարտականություններն այնպես, ինչպս նախատեսված է, ենթարկվել են տիկին Աննայի ճնշմանը, այդ դեպքում իրենք կարող են ուղղակի չսպասարկել։ Որովհետեւ այդ ժամանակ հակառակն է, ոչ թե իրենք են ենթարկվում պաշտոնատար անձին, այլ պաշտոնատար անձն է ենթարկվում իրենց հրահանգներին, իսկ չկատարելու դեպքում իրենք կարող են ուժ գործադրել։ Դա ամրագրված է օրենքով»,-նշել էր նա։