«Լուկաշենկոն, ըստ էության, անցել է քաղաքական կոռեկտության բոլոր սահմանները։ Որևէ երկրի բարձրագույն պաշտոնյային անվայել վարքագիծ է ու պահվածք։ Իբրև ՀՀ քաղաքացի սարսափելի վիրավորված եմ իմ պետականության և հայրենիքի համար, այսօրինակ նվաստացման համար»:
Այսօր «Հրապարակի» հետ զրույցում ասաց ԱԺ «Հայաստան» խմբակցության պատգամավոր Լիլիթ Գալստյանը: «Բայց իբրև քաղաքական մարդ նույնքան վիրավորված եմ և տարակուսած, թե ինչու Հայաստանից չկա պաշտոնական արձագանք։ ԱԺ-ից հնչած մի քանի զրուցարանի մակարդակի գնահատականները ոչինչ չարժեն», - նշում է պատգամավորը:
«Ցավալիորեն ակնհայտ է, որ մեր անկախության անցնող երեսուն տարիներին որևէ մեկը Հայաստանի հետ այսպես խոսելու հանդգնություն չի ունեցել։ Այսպես խոսում են Հայաստանը պարտության և նոր կործանումների տանող քաղաքական ուժի հետ։ Այսպես խոսում են միջազգային սուբյեկտայնությունը կորցրած երկրի հետ։ Սա նախևառաջ վարչախմբի նվաստացումն է»:
