Ժողովրդական կուսակցության նախագահ Տիգրան Կարապետյանն այլևս ՕՐՕ դաշինքի գաղափարակիրը չէ, նա hraparak.am-ի հետ զրույցում նշեց, որ իրեն այլևս հոգեհարազատ է Ժիրայր Սեֆիլյանի մոտեցումները։
«Ինձ Ժիրայր Սեֆիլյանի մոտեցումներն են հրապուրում, ես ողջունում եմ այդ մոտեցումները, որ ազգային ճակատ են ստեղծում փաստորեն, իսկ մնացածը․․․ ես չեմ տեսնում որևէ մի մոտեցում, որն ի նպաստ կլինի ժողովրդին»։ Թեպետ Տիգրան Կարապետյանը քաղաքական ասպարեզում չէ ընտրություններից հետո, սակայն հետևում է իրադարձություններին, անդրադառնալով Սերժ Սարգսյանի վարչապետ դառնալու վարկածին, Տիգրան Կարապետյանը նշեց, որ դա ժողովրդի բողոքը կհարուցի․ «Ժողովուրդը դժգոհ է, բայց չգիտեմ ինչու ընտրություններին փող է վերցնում և նպաստում է այն մարդկանց ընտրությանը, որոնց չի սիրում, որոնց չի հարգում։ Դա մեր ցավն է, ինչ անենք»։
Պարոն Կարապետյան, իսկ ծանո՞թ եք «Զինվորական ծառայության և զինծառայողի կարգավիճակի մասին» օրինագծին․ «Ես համարում եմ, որ Վիգեն Սարգսյանին «պադստավկա» են անում, համենայն դեպս, դա լավ բան չէ։ Ի՞նչ է նշանակում երկարացնել կամ ձևափոխել, ուղղակի չեն հավաքում այն քանակը, որ իրենց պետք է և օյիններ են հորինում»։ Տիգրան Կարապետյանը խոսեց նաև վերջերս աղմուկ հանած մեկ այլ օրինագծի՝ «Ընտանեկան բռնության կանխարգելման և ընտանեկան բռնության ենթարկված անձանց պաշտպանության մասին» օրենքի նախագծի մասին․ «Ես համարում եմ, որ Եվրոպան և Հայաստանը տարբեր ավանդույթներ ունեն և մաքսիմալ ձևով ընդօրինակել այն ինչ-որ Եվրոպայում ընդունվում է, ես համարում եմ դա սխալ»։
Հիշեցնենք, որ Ժողովրդական կուսակցության նախագահն Ազգային ժողովի ընտրություններից առաջ միացել էր ՕՐՕ դաշինքին։
