Բազմաթիվ հայեր կան, որ այս պահին գծի մեջ են ու կարող է մտնեն Գազա

ՀԱՄԱՍ-ը շարունակում է հրթիռակոծել Իսրայելի կենտրոնական հատված՝ օրական երկու կամ երեք հրթիռ ընկնում է։ «Հրապարակի» հետ զրույցում տեղեկացրեց Իսրայելի հայկական համայնքների ներկայացուցիչ Քրիստինե Մովսիսյանը։

«Գազայի կողքի բնակավայրերը՝ Աշկելոն, Սդերոտ, Դիվոտ քաղաքներն անընդհատ հրթիռակոծում են։ Այս քաղաքների քաղաքացիների մեծամասնությանը այնտեղից հանել են, բերել են Իսրայելի ավելի կենտրոնական տավածներ, տեղավորել հյուրանոցներում, որպեսզի այնտեղ կարողանան պատերազմը շարունակել»,-ասաց Մովսիսյանը։

Իսրայելի զոհերի թիվն անցել է 1300-ը, վիրավորները 1800-ն են:

Իսրայելը շարունակում է ուժգին հարվածներ հասցնել Գազային, սակայն պաղեստինցիներին հաջողվում է նաև Իսրայելի կենտրոնական հատվածները հրթիռակոծել:
«Մարդիկ հիմնականում տներում են, ծովափերը չեն գործում, ռեստորանները փակ են: Այսպիսի պահերին Իսրայելի քաղաքացիները բոլորը իրենց տներում են լինում: Իսրայելում նման բան չկա, որ Իսրայելի մի հատվածում պատերազմ լինի՝ կենտրոնական հատվածում ուտեն, խմեն, քեֆ անեն՝ նման բան չկա: Սգի նման բան է, եթե մարդիկ դրսում են՝ ուրեմն գնում են աշխատանքի կամ գնում են ինչ-որ առևտուր անելու»,-շեշտեց Իսրայելի հայկական համայնքների ներկայացուցիչը:

Հայերի թվում զոհեր և վիրավորներ չկան, սակայն Իսրայելի բանակ զորակոչված ազգությամբ բազմաթիվ հայեր կան, որոնց ամեն պահի կարող են հրամայել մտնել Գազա՝ ցամաքային օպերացիային մասնակցելու համար:

Քրիստինե Մովսիսյանի հետ խոսելու ժամանակ ՀԱՄԱՍ-ի հրթիռներից մեկը խոցեց Իսրայելի կենտրոնական հատվածում գտնվող Բատ Յամ քաղաքը, որտեղ բնակվում է Մովսիսյանը: Հրթիռն ընկել է նրա տնից ընդամենը հարյուր հիսուն մետր հեռավորության վրա:

Տեսանյութն՝ այստեղ