Խաչքարերը դուրս ենք բերելու, բա թողնենք վրաները միզե՞ն. Աղավնոյի գյուղապետ

Ինչպես արդեն տեղեկացրել ենք` Բերձորի բնակիչներն այս պահին փակել են Լաչինի միջանցքի ճանապարհը՝ պահանջելով չհանձնել Բերձորը։ Արցախի իշխանությունները Բերձորի եւ Աղավնոյի բնակչությանը փոխանցել են, որ մինչեւ օգոստոսի 25-ը պետք է լքեն իրենց տները, քանդեն իրենց գերեզմաններն ու հարազատների շիրիմները տեղափոխեն նոր բնակավայր։ Աղավնոյի գյուղապետ Անդրանիկ Չավուշյանը ստեղծված իրավիճակի վերաբերյալ  ասաց, որ ժամանակը տրված է, այդ ընթացքում պետք է բնակիչները դուրս գան իրենց տներից։ Չավուշյանի խոսքով` գյուղն ունի 170 բնակիչ, պետությունը խոստացել է լուծել նրանց կեցության հարցերը, իսկ թե ինչպես եւ երբ, դեռեւս հայտնի չէ. «Ասել են` լուծելու ենք այդ հարցը, ասել են` ով, որտեղ, ուզում է, ցանկանում է այդտեղ էլ կարող է մնալ։ Մենք պետք է ընտանիք֊ընտանիք ներկայացնենք։ Հեսա դուրս են գալու էլի բնակիչները»։ Նա ասաց, որ գյուղի խաչքարերը գյուղից դուրս են բերելու. «Բա ի՞նչ անենք, կներեք, թողնենք, գան, վրան միզեն, ինչի՞ համար թողնենք։ Երևի մարդիկ իրենց գերեզմաններն էլ կտանեն, չգիտեմ։ Անճար են մարդիկ»։