Ովքե՞ր են եղել «Ռոյալ» խաղատան կրակոցների կիզակետում

Նախօրեին  տեղեկություն տարածվեց, որ ապրիլի 4-ի գիշերը ուշ ժամին կրակոցներ են հնչել Ծաղկաձորի «Ռոյալ» խաղատան մոտ, որտեղ ներկա է եղել հանրապետության քաղաքապետերից մեկը: Ըստ տեղեկության` իրավապահները այդ քաղաքապետին են փնտրում, որը դեպքի վայրից հեռացել է: Մեզ որոշակի մանրամասներ են հայտնի դարձել միջադեպից:

Մեզ ասացին` խոսքը Արթիկի քաղաքապետ Մխիթար Վարագյանի մասին է, որը, սակայն, կրակոցների հետ կապ չի ունեցել, պարզապես խաղատանն է եղել, և կրակոցներից հետո արագ հեռացել է, որ իր անունը չկապվի միջադեպի հետ: Իսկ միջադեպի կիզակետում, ըստ մեր տեղեկության, իշխանությունների մերձավոր կրիմինալ դեմքերից մեկն է եղել, քրեական պատմություններով հայտնի Ռուստամ Ստեփանյանը` Չաղ Ռուստամը, որի անունը տեւական ժամանակ է կապվում է պատգամավոր Հայկ Սարգսյանի անվան հետ: Ստեփանյանը որոշ ժամանակ առաջ կրկին կրակոցների կիզակետում էր հայտնվել՝ Նուբարաշենի գերեզմանոցի մոտ: Այս անգամ Ծաղկաձորում տուժողներ չկան, ասացին` կրակոցներից հետո ինչ-որ անձինք մեքենան թողել փախել են անտառ: Նախնական տեղեկությամբ` միջադեպի հիմքում հին վեճ է եղել, և Ռուստամն ու մյուս կողմը պատահաբար հանդիպել են խաղատանն ու հիշել հին հաշիվները:

Թեմայի վերաբերյալ կապվեցինք Արթիկի քաղաքապետ Մխիթար Վարագյանի հետ: Վերջինս հարցը լսելուն պես`զարմացավ. «Էդ ո՞վ է ասողը, ով որ տենց բան է ասել, զանգեք իրեն, խի՞ եք ինձ զանգել»: Ապա հավելեց` չկա նման բան: Երբ նկատեցինք, որ ըստ լուրերի` ինքը կրակոցների պահին ներկա է եղել խաղատանը, հետո հեռացել է, Արթիկի քաղաքապետը նորից զարմացավ.

«Ո՞նց թե՝ Դուք ներկա՞ եք եղել, հետո հեռացե՞լ եք: Ասում եմ` չկա նման բան»:

Հարցրինք` Ծաղկաձորում չի՞ եղել այդ օրը: «Ծաղկաձորում ուրիշ հարցով եմ եղել»: Իսկ տվյալ խաղատանը եղե՞լ եք․ «Ասում եմ` չէ, ես ընդհանրապես տեղյակ չեմ էդ միջադեպից, հիմա էլ զբաղված եմ», -ասաց քաղաքապետն ու անջատեց հեռախոսը:

Մենք ճշտեցինք նաեւ, որ Արթիկի քաղաքապետը, Չաղ Ռուստամն ու Հայկ Սարգսյանի հայրը հնուց մտերիմներ են եւ նրանց նույն խաղատանը հայտնվելը ոչ պատահականություն է, ոչ անսպասելի մի բան։