Բաքուն ու Մոսկվան գոհ են միմյանցից․ անդրադարձ է եղել նաև ԼՂ-ին

Ադրբեջանի փոխվարչապետ Շահին Մուստաֆաևը հանդիպել է այցով Բաքվում գտնվող Ռուսաստանի փոխվարչապետ Ալեքսեյ Օվերչուկին, հայտնում են տեղի ԶԼՄ-ները։ 
Հանդիպմանը գոհունակություն է արտահայտվել տարբեր ոլորտներում ադրբեջանա-ռուսական հարաբերությունների հաջող զարգացման կապակցությամբ։ Նշվել է, որ 2022 թվականի փետրվարի 22-ին Մոսկվայում Ադրբեջանի և Ռուսաստանի նախագահների կողմից «Ադրբեջանի Հանրապետության և Ռուսաստանի Դաշնության միջև դաշնակցային համագործակցության մասին հռչակագրի» ստորագրումը երկկողմ հարաբերությունները որակապես նոր մակարդակի հասցրեց։
Բարձր են գնահատվել մինչև 2024 թվականը ադրբեջանա-ռուսական համագործակցության առանցքային ոլորտների զարգացման ճանապարհային քարտեզների իրականացման արդյունքները, և արտահայտվել է փոխադարձ հետաքրքրություն այդ համագործակցությունը շարունակելու համար։ 2018-2023 թվականներին, ընդգրկելով ճանապարհային քարտեզների իրականացման ժամանակահատվածը, գործնական քայլեր են ձեռնարկվել առևտրի պարզեցման և ապրանքների հոսքի դիվերսիֆիկացման, մաքսային և սահմանային անցակետերի ենթակառուցվածքների բարելավման և պետական ​​սահմանով բեռնափոխադրումների ծավալների մեծացման ուղղությամբ։

Ձեռնարկված միջոցառումների արդյունքում ապահովվել է ադրբեջանա-ռուսական առևտրատնտեսական հարաբերությունների կայուն դինամիկա, 2017 թվականի համեմատ ապրանքաշրջանառությունն աճել է ավելի քան երկու անգամ՝ անցած տարի գերազանցելով 4,3 մլրդ ԱՄՆ դոլարը։ Հանդիպմանը նշվել է փոխադարձ ներդրումների ոլորտում հաջողված նախագծերի կարևորությունը, մտքեր են փոխանակվել այս ուղղությամբ համագործակցության ընդլայնման հեռանկարների շուրջ։

Բարձր է գնահատվել արդյունաբերության ոլորտի տարբեր ոլորտներում փոխգործակցության մակարդակը, և նշվել է, որ այդ համագործակցությունն ընդգրկում է նաև «օկուպացիայից ազատագրված Ադրբեջանի տարածքները»։ Հավարտ բանակցությունների՝ Ադրբեջանի և Ռուսաստանի փոխվարչապետները ստորագրել են «2024-2026 թվականների ադրբեջանա-ռուսական համագործակցության առանցքային ոլորտների զարգացման ճանապարհային քարտեզը»։